Светската трговија се врти кон Европа затоа што другите земји сакаат договори со Европската Унија, изјави претседателката на Европската комисија, Урсула фон дер Лајен. Таа на митингот на Европската народна партија во Валенсија истакна дека Европската унија „веќе има најголема мрежа на договори за слободна трговија, од кои 76 со земји од целиот свет“.

„Сега светската трговија се свртува кон нас“, смета фон дер Лајен, во време кога светот е загрозен од воведувањето на американските царини што американскиот претседател Доналд Трамп ги објави на почетокот на април, објави Хина.

Од крајот на минатата година, ЕУ потпиша нов бран трговски договори, од јужноамериканскиот сојуз Меркосур, до Мексико и Швајцарија, потсети претседателот на Комисијата.

„Да останеме смирени и обединети“ „Сега соработуваме со Индија и Индонезија, Обединетите Арапски Емирати и Тајланд, Филипините и Малезија, со Пацификот. Сите тие сакаат договор со нас, бидејќи ние сме фер, сигурни и играме според правилата“, нагласи фон дер Лајен.

„Затоа да останеме на овој пат, со ладна глава и обединети.“ Фон дер Лајен изјави дека ЕУ мора истовремено да работи на зајакнување на својот единствен пазар преку укинување на непотребните национални бариери, борбата против фрагментацијата и бирократијата.

„Ако ги отстраниме сите трговски бариери во рамките на Унијата, би можеле да го зголемиме БДП до 10 проценти. Затоа е време да ги скршиме оковите. Европа беше лулка на иновациите. Да ја ослободиме европската иновација“, рече германската демохристијанка, објави Ал Џезира Балканс.