Министерот за економија и одржлив развој Давор Филиповиќ по серијата средби со трговците изјави дека сите со кои разговарал се подготвени да ја поддржат владината иницијатива за намалување на цените на производите од потрошувачката кошница, најавувајќи утре состанок во Владата на истата тема и деталите од договорот за следните два дена.

Начелно сите трговци го поддржаа владиниот предлог и разговорите ќе продолжат утре. Ќе има состанок во Владата и потоа ќе можеме да излеземе со детални информации, рече Филиповиќ во вторник по средбите со претставници на трговските синџири и трговските здруженија. Идејата, рече тој, е вкупната вредност на кошничката со производи, која е достапна на веб-страницата на министерството каде се следи движењето на цените, да се врати на 31 декември минатата година, објави Н1 Хрватска.

Запрашан кога може да почнат да паѓаат цените, Филиповиќ одговори дека некои од трговските синџири мора да направат пресметки и внатрешни консултации денеска и дека „некои можат да реагираат уште во петок“. Тој не верува дека некои од трговците ќе избегнат намалување на цените, бидејќи, како што рече, со тоа би се изигрувале хрватските граѓани, а во интерес на трговците е да се зачува куповната моќ на граѓаните. Тој објасни дека не станува збор за симнување на цените на 360 производи, туку за вкупната вредност на кошницата, која ќе биде вратена на 31 декември „кај некои трговци кои можат“, а има и такви што нема да можат да го направи тоа целосно, но, на пример, за 90 проценти.