Без динамика, борба, активност и без видливост дека за партиски функционери се избираат најквалитетните луѓе на предлог на базата, тешко и макотрпно ќе биде реформирањето на СДСМ за на локалните избори да има барем минимални шанси да се врати во политички живот и на редовни парламентарни избори да биде конкурент на владејачката ВМРО-ДПМНЕ.

Ова се првичните впечатоци на сопартијци, но и на политички аналитичари по Конгресот на партијата, на кој Фани Каранфилова-Пановска од невладиниот сектор беше избрана за заменик-претседателка на лидерот на СДСМ, Венко Филипче. Беа избрани и новиот состав на Централниот и на Надзорниот одбор.

За дел сопартијци со кои контактираше „Слободен печат“, токму изборот на заменик-претседателката, која доаѓа од граѓанскиот сектор, е грешка што СДСМ не ја научи од искуството со Шарената револуција. Дел сопартијци, пак, им даваат шанса на Филипче и на партиското раководство кое треба да се екипира наскоро, да го консолидира и да го крене СДСМ по историскиот пораз на парламентарните избори.

– Убедена сум дека ќе го вратиме статусот, угледот, кредибилитетот, поддршката и победите на единствената државничка партија во Македонија, нашиот СДСМ – порача Каранфилова-Пановска во обраќањето пред делегатите.

За неа сега е клучно враќањето на довербата на слободоумните граѓани.

– Моето нафаќање и ангажман ќе биде особено значајно и се надевам ќе биде од голема помош, во оваа фаза на темелни внатрешни промени и реформи, дефинирање на новиот курс и позиционирањето на партијата, имајќи ги предвид сите предизвици, а особено оној, за мене клучен и суштински, а тоа е враќањето на довербата кај слободоумните граѓани на кои вредносната оска на социјалдемократијата им е блиска, а кои во изминатиот период се разочараа од СДСМ и се чувствуваат изневерено. Нив мора да ги вратиме – рече Каранфилова-Пановска.

Таа најави консолидација на партијата во најширока смисла од раководство, општински организации, членови, симпатизери, поддржувачи, природните сојузници меѓу граѓанството, и тоа да се преточи и во консолидирано делување на сите нивоа.

Сегашната промена недоволна за резултат на локалните

Политичкиот аналитичар Марко Трошановски смета дека на СДСМ му претстои подолг период на рехабилитација. Тој смета дека сегашната промена малку веројатно е дека ќе резултира со подобар исход на локалните избори, но дека е шанса за нов почеток.

– Пред сè, партијата мора во практиката да покаже политики на интегритет што значи демократски избор на своите кандидати преку мерит-процес, односно најдобрите и најкомпетентните, а не партиските војници да им бидат понудени на граѓаните како идни носители на јавни функции. Тука СДСМ значително потфрли. Ако покаже успех на тој план, да речеме и со помош на новата потпретседателка што доаѓа од граѓанскиот сектор, мислам дека има шанси да почне да се рехабилитира – вели Трошановски, претседател на Институтот за демократија „Социетас цивилис“.

Трошановски мисли дека кооптирањето со граѓанскиот сектор ќе оди малку потешко.

– Ризикот од тоа граѓанското општество да биде перципирано во функција на партиски интереси постои и верувам дека голем дел од граѓанските организации и поединци вклучени, ќе бидат експлицитно ставени во функција на СДСМ. Но, главно е дека, без оглед од каде доаѓа и кое е партиското раководство, без докажување дека вистинските квалитетни луѓе доаѓаат до израз, а не партиските лојалисти, е единствен начин да почне возобновувањето на угледот и кредибилитетот на СДСМ – вели Трошановски.

Филипче ни пола од капацитетот што го има не го вложува во партијата

Поранешен партиски функционер смета дека голема грешка е изборот на Каранфилова-Пановска за заменик-претседателка и доказ дека партијата ништо не научила од искуството со Шарената револуција кога невладини претставници станале владини функционери и со тоа голем дел од граѓанскиот сектор станал неупотреблив. Изборот на заменик-претседателката е кулминација на погрешната политика. Според ексфункционерот, постои желба партијата да се крене, но мора да се забрзаат работите.

– Впечаток е дека Филипче ни половина од капацитетот што го има, не го вложува во партијата. Пет месеци нема ново раководство. Се уриваат влади и се избираат нови за недела-две, а во партијата ништо не се помести по изборот на Филипче. Желба кај сопартијците има, но за да се крене партијата мора да се забрзаат работите. Фали динамика на настаните, борба и силно наметнување во јавноста – дека СДСМ е главната опозициска партија. Да не се залажуваме сега – главната битка прво ни е со Левица за СДСМ да го има главното опозициско столче, а дури потоа битката е битката со ВМРО-ДПМНЕ за власт. Мислам дека не се работи на зајакнување на партијата, туку се оди на варијантата народот за да се разочара од власта, што е лоша тактика – вели поранешниот функционер.

Друг негов сопартиец, пак, смета дека дури по изборот на партиското раководство ќе се динамизираат работите на терен и ќе почне суштинската работа на реформирање на партијата. Според него, изборот на заменик-претседателката од невладиниот сектор е добро решение зашто во моментов и нема некој кадровски потенцијал во СДСМ за таа функција. Тој се согласува дека Каранфилова-Пановска не ја познава партијата, но вели дека на терен ќе трча раководството за да ги консолидира редовите. Нашиот соговорник очекува Филипче и новото раководство да ја водат партијата до парламентарните избори, односно по најмалку два изборни циклуси – локалните следната година и, особено редовните парламентарни – ќе бидат тестот дали успеале да го реформираат и кренат СДСМ.

– Борбата мора да продолжи, секој сопартиец да се вложи, да се тргнат суетите и сите да помогнеме зашто најлошото што може да се случи е да се „смачка брендот“. Да му дадеме шанса на Филипче. Како опозициска партија треба активно да укажува на недоследностите на власта – вели соговорникот.

Филипче: Партија не е ничија лична сопственост

Филипче порача дека Конгресот е пресвртница во опозициското дејствување на СДСМ, нов почеток, борба и надеж дека партијата може да се врати таму каде што ѝ е местото – на победнички патеки.

– СДСМ нема да се откаже, тоа треба на сите да им биде јасно. СДСМ ќе го биде и ќе се врати посилен. Оваа партија не е ничија лична сопственост. Ниту на Бранко, ниту на Заев, ниту на Владо, Радмила, Димитар, а најмалку моја – рече Филипче, додавајќи дека СДСМ не смее и нема никого да заборави.

Впечатливо е дека за историскиот пораз, партискиот лидер рече дека одговорноста е на сите, на некој повеќе, на некој помалку. Смета дека ексвладите на СДСМ не се справиле до крај со криминалот и корупцијата и побара сите случаи на корупција и прекршување на законите да бидат третирани од надлежните, но да се почитува презумпцијата на невиност, а секој криминал што ќе биде докажан во фер и праведна постапка, да биде санкциониран.

– Никој не е недопирлив! Тоа важи и за нас, но да бидат сигурни овие од власта што се закануваат, дека ќе важи и за сите сегашни функционери на владејачката коалиција – рече Филипче и порача дека нема да толерира ароганција во партијата зашто тоа ја уништува суштината на нивното постоење.

Од поранешните лидери, на Конгресот присуствуваа само Владо Бучковски и Димитар Ковачевски.

Мицкоски е разочаран од новото раководство на СДСМ

Премиерот Христијан Мицкоски е разочаран од новото раководство на СДСМ и смета дека нема да бидат конструктивна опозиција.

– Ние не може да кажеме какво раководство треба да има СДСМ, тие одлучиле дека такво раководство заслужуваат. Не сум импресиониран од ова раководство. Напротив, разочаран сум зашто ценам дека овие луѓе не можат да бидат конструктивна опозиција и додадена вредност на политичката сцена и дека ќе продолжат со конструкции, измислици, ниски странски, дневни навреди – изјави Мицкоски.

СДСМ да се врати на граѓанскиот концепт и да не забегува во национализам, му порача на новото раководство вицепремиерот Изет Меџити.

– На новоизбраното раководство на СДСМ им посакувам успех со почнатите реформи и да се придржуваат до тоа што е својствено на нивните политики. Од граѓански концепт, во последно време забегаа во националистички и тврди ставови, што мислам дека не им оди во прилог – изјави Меџити.