Претседателот на СДСМ, Венко Филипче, на средба со граѓани во Радовиш рече дека после четири години од мандатите на градоначалниците на ВМРО-ДПМНЕ, општините се запуштени, а граѓаните разочарани.

„Во Радовиш прошетав на плоштадот – страшно и жално е колку еден среден град, каков што беше порано, сега е запуштен и задушен во смет. Инфраструктурата, улиците, чистотата – тоа се клучните индикатори колку градската власт се грижи за граѓаните и за градот. Тука во Радовиш, како и во многу други општини каде ВМРО-ДПМНЕ има градоначалници, гледаме целосна негрижа, неспособност и отсуство на визија“, рече Филипче.

Тој вели дека колку и да се обидува власта да ја убеди јавноста дека во државата се живее добро, општините се развиваат, реалноста на терен е поинаква – „граѓаните гледаат и чувствуваат на свој грб дека со оваа власт не се заштитени и живеат полошо од претходно“.

„Граѓаните се разочарани и знаат да казнуваат. ВМРО-ДПМНЕ имаат страшен пад во гласовите на анкетите. За само една година, нова влада која што дојде на власт со толкаво мнозинство на гласови да има таков пад – близу 100.000 гласа, тоа значи дека граѓаните знаат, не можеш да ги прелажеш“, порача претседателот на СДСМ.

Според Филипче, државата мора да се врати на вистинскиот пат, а како што рече СДСМ е подготвен да го предводи тој процес со одговорна и транспарентна политика.