Акциите на Фејсбук паднаа за повеќе од 20 отсто во продолженото тргување во средата, откако компанијата објави разочарувачка заработувачка, објави слаби прогнози и соопшти дека растот на корисниците стагнира. За сето ова го обвини зајакнувањето на конкуренцијата, пред сѐ на Тик Ток и Епл.

Бројот на глобални дневни активни корисници на Фејсбук падна за првпат во споредба со претходниот квартал, на 1,929 милијарди од 1,930 милијарди, објави Ројтерс.

Компанијата, која неодамна беше преименувана во Мета, издаде разочарувачки насоки за првиот квартал годинава, покрај тоа што изгуби и профит и доживеа пад на бројот на корисници во четвртиот квартал од минатата година. Бројот на дневни активни корисници (ДАУ) на Фејсбук е нешто помал во четвртиот квартал во споредба со претходниот квартал. Тоа е првиот забележан квартален пад на ДАУ.

Фејсбук соопшти дека приходот во првиот квартал ќе биде од 27 до 29 милијарди долари, додека аналитичарите очекуваа продажба од 30,15 милијарди долари, според Refinitive. Тоа би значело зголемување од 3 до 11 отсто во однос на претходната година.

Мета соопшти дека претрпела удар поради промените во приватноста во оперативниот систем на Епл, поради што на брендовите им е отежнато да ги таргетираат и мерат нивните реклами на Фејсбук и Инстаграм. Компанијата како причина ги наведе макроекономските прашања како што се прекините на синџирот на снабдување, пренесува Ројтерс.

Фејсбук соопшти дека платформата трпи влијанија од комбинација на фактори, вклучително и промени во приватноста на iOS на Епл и макроекономски предизвици. Исто така, ја обвини инфлацијата и проблемите со синџирот на снабдување кои влијаат врз буџетите на огласувачите поради што има помал раст од очекуваниот.

Во четвртиот квартал, Фејсбук се покажа како лош исклучок меѓу водечките технолошки компании. Алфабет ги надмина проценките, поради што неговите акции вчера пораснаа. Епл и Мајкрософт исто така ги надминаа проценките за профитот и приходите.