Економскиот пад во еврозоната во четвртиот квартал од 2020 година, како резултат на воведувањето мерки за „затворање” поради коронавирусот, беше помал од очекуваниот, покажуваат денешните прелиминарни проценки на Евростат.

Бирото за статистика на Европската унија соопшти дека, според нивната брза проценка, бруто домашниот производ на 19-члениот блок се намалил за 0,7 проценти во последните три месеци во однос на претходниот квартал, додека во споредба со четвртото тромесечје во 2019 година паднал за 5,1 процент.

Економистите, сепак, предвидуваат дека трендот на пад на економијата ќе продолжи и во првиот квартал на оваа година.

– Во првиот квартал од 2021 година, падот веројатно ќе биде нешто поостар, но не како оној во првата половина на 2020 година. Наместо тоа, веројатно ќе има забележително закрепнување уште во текот на пролетта, вели Кристоф Вајл, економист во Германска Комербанка.

Прелиминарните податоци на Евростат покажуваат дека Франција и Италија, чии економии се на второ и трето место по големина во ЕУ, забележаа пад на БДП на годишно ниво од 1,3 и 2,0 проценти, во последниот квартал од минатата година.

Од друга страна, германската економија порасна за 0,1 процент во споредба со третиот квартал, а шпанската за 0,4 проценти.

Аналитичарите објаснуваат дека падот во четвртиот квартал бил поблаг отколку во првата половина на годината, бидејќи ограничувачките мерки биле прилагодени по сектори и помалку рестриктивни од претходните.

Евростат соопшти дека според првите проценки за 2020 година, врз основа на сезонски и календарски прилагодени квартални податоци, економијата во еврозоната падна за 6,8 проценти, а во 27-члената Европска унија за 6,4 проценти.

Според Европската статистичка служба, ова е најдлабокиот годишен пад откако тој вид на евиденција започна да се води во 1995 година. Дури и по глобалната финансиска и економска криза од 2008 година, падот следната година беше само 4,3 проценти, забележува Евростат.

Извор: МИА