Судот на правдата на Европската Унија ја отфрли линијата на владата на Џорџа Мелони за имиграцијата и создавањето затворени центри за притвор во Албанија.

Пресудата на европските судии нагласува дека „земјите-членки на Европската Унија не можат да вклучат во списокот на безбедни земји на потекло на имигрантите држави кои не нудат задоволително ниво на заштита на сите свои жители“.

Ова е главната точка на конфронтацијата меѓу владата на Рим и италијанското судство, кое во последните месеци нареди ослободување на многу имигранти кои беа префрлени во двата затворени центри во Албанија, токму затоа што не доаѓаа од безбедни земји. Тие не треба да се враќаат во држави во кои нема доволно безбедност за малцинствата, почитување на сексуалната ориентација и човековите права воопшто.

Европските судии, исто така, додадоа дека овој пристап ќе остане на сила до јуни 2026 година, кога ќе се спроведат нови правила за сите земји-членки. Дотогаш, судиите на секоја земја ќе имаат право да контролираат и да интервенираат, со своите одлуки, во секој список на безбедни земји на потекло составен од владите.

Удар врз политиката на Мелони

Јасно е дека оваа одлука ја ослабува владата на Џорџа Мелони, која досега тврдеше дека не треба да има никаков вид интервенција од страна на судството во управувањето со имиграцијата и бегалците. Во соопштението на италијанската влада, денес се нагласува дека „уште еднаш, судството – овој пат европското – тврди дека има надлежности што ги нема, бидејќи станува збор за прашања од политичка одговорност“.

Според печатот, двата објекти што Италија ги постави во Јандер и Сењ во северна Албанија минатата година работеа само пет дена со цена од 114.000 евра за дваесет и четири часа. Во последните месеци, Италија ги трансформираше од центри за баратели на азил во објекти каде што нерегуларните мигранти се префрлаат за депортација.

Сепак, и во овој случај, судиите пресудија дека многу процедури не го почитуваат важечкото законодавство. Денешната пресуда на Европскиот суд на правдата е донесена точно во времето кога италијанската премиерка Џорџа Мелони пристигна во Истанбул на средба со турскиот претседател Реџеп Таип Ердоган.

Се очекува средба на која ќе учествува и премиерот на привремената влада на Триполи, Абдул Хамид Дбеиба. Нивната главна тема на разговор е миграцијата и управувањето со миграциските текови.