На денешната седница на Битолскиот Совет, советниците на новото неформално мнозинство коешто го сочинуваат СДСМ, „Поинаку“ и Левица со 18 гласови „за“ ја симнаа од Дневниот ред точката за европскиот прекуграничен проект „Smart4you2“.

Поводот за симнување на точката од дневниот ред е барањето на советниците да им се објасни поради кои причини локалната самоуправа бара да се пренаменат средствата од европскиот проект „Smart4you2“ во изградба на велосипедски патеки.

-Основата на проектот уште кога се аплицираше во 2019 година беше да се направи проектот Парк бидејќи истиот е под заштита на споменици и да се добие комплетна целина кај Офицерскиот дом во Битола и истиот да има туристичка намена. Објектот Парк, еден дел треба да биде кафе бар. Вториот дел да биде за продажба на сувенири и ракотворби и останатиот дел да биде информативен за туристите. Основата на тој објект е туризам. Во прашање е доведен целиот проект, бидејќи од локалната власт се безидејни и суетни. Во проектот никаде нема велосипедски патеки. Побаравме повлекување на точката бидејќи треба да ни разјаснат како дојдоа на идеја да ги пренаменат средствата-вели советничката на СДСМ Мирјана Захариевска-Ралевска.

За ВМРО-ДПМНЕ повлекувањето на точката од дневниот ред претставува непријатна ситуација за Битола бидејќи станува збор за европски проект и истиот се кочи.

-Изненадени сме од барањето на СДСМ за повлекување на точката за кофинансирање на европскиот проект „Smart4you2“ со чија пренамена треба да бидат изградени велосипедски патеки во Општина Битола. За жал, таа точка што беше предложена од СДСМ доби поддршка и од советниците на „Поинаку“ и Левица. Ова ќе донесе ново продолжување на проектот и наместо со донесувањето на оваа одлука после објавувањето во Службен гласник да се пристапи кон тендерски постапки, сега ќе треба да чекаме нова седница и нова волја од страна на советничките групи да се донесе одлуката. Јас се надевам дека ќе надвладее разумот, не сакам да верувам дека ќе се стави Општината Битола на црна листа и да не може да аплицира на европски проекти-вели координаторот на советничката група на ВМРО-ДПМНЕ, Бојан Бојкоски.

Симнувањето на точката за овој прекуграничен проект непријатно го изненади и градоначалникот на Битола, Тони Коњановски.

-Со потпишувањето на анексот од страна на Делегацијата на Европската Унија, во кој се дозволува пренамена на средствата од проектот „Smart4you2“ за реконструкција на тротоарите на улиците „Васко Карангелевски“ и „Партизанска“, по што соодветно ќе се изведат и велосипедски патеки, Битола ќе добие велосипедски дел во должина од над 5 километри. Реконструкцијата ќе се изведе на веќе постоечките тротоари, во ширина од 3 метри, без да се нарушува зелениот појас на улиците. За овој проект веќе е изработена техничка документација, како и основен сообраќаен проект за воведување на велосипедски патеки во централното градско подрачје во Битола, со сите потребни одобренија. Да појаснам уште еднаш, дека до ова решение се дојде со целосна усогласеност на сите партнери во проектот, како и на Делегацијата на Европската Унија. Првичната намена беше реконструкцијата на објектот Парк, но поради инфлациите и состојбата со Ковид кризата, вредноста за реконструкција двојно се зголеми, што беше пречка за реализација на проектот и во рамките на ЕУ и кај општините партнери во проектот. Затоа се побараа соодветни решенија, кои беа понудени како замена за објектот Парк. Од наша страна беа предложени партерното уредување на Офицерскиот дом, кое веќе се реализира со општински средства, како и санацијата на постоечките тротоари на улиците „Васко Карангелевски“ и „Партизанска“, со поставување на велосипедски патеки. Од страна на Делегацијата на ЕУ, беше избран проектот за санација на тротоарите и поставување на велосипедски патеки-изјави градоначалникот на Битола Тони Коњановски.

Инаку, проектот „Smart4you2“ е поддржан од програмата за прекугранична соработка на Европската Унија за промоција на културното наследство во Северна Македонија и во Албанија.