Европската централна банка (ЕЦБ) ја намали својата клучна каматна стапка по осми пат, со цел да ги поддржи бизнисите и потрошувачите преку тоа што ќе го направи позајмувањето подостапно, бидејќи трговската војна на американскиот претседател Доналд Трамп се заканува да го забави растот. Во седиштето на ЕЦБ во Франкфурт, управниот одбор одлучи да ги намали каматните стапки за четвртина процентен поен.

Европската централна банка ќе ги намали своите клучни каматни стапки за 0,25 процентни поени од 11 јуни. Каматната стапка за депозитни средства ќе се намали на 2 проценти, стапката за главните операции за рефинансирање на 2,15 проценти, а стапката за маргинално кредитирање на 2,40 проценти, објави ЕЦБ.

Аналитичарите ги очекуваа намалувањата, со оглед на послабите изгледи за раст откако Трамп објави серија нови царини на 2 април, а потоа се закани дека ќе воведе увозни даноци за европски стоки. Останува прашањето колку далеку ќе оди банката на своите следни состаноци.

Претседателката на ЕЦБ, Кристин Лагард, на прес-конференција по одлуката изјави дека многу зависи од тоа дали трговските тензии со САД можат да се решат.