Европската комисија со Одлука за спроведување го одобри првото ослободување на средства за Македонија во рамки на Инструментот за реформи и раст за Западен Балкан, во износ од осум милиони евра.

-Од нив, 2,3 милиони евра се неповратна помош, два милиона евра заем достапен преку Инвестициската рамка за Западен Балкан, како и 3,7 милиони евра заем за директна буџетска поддршка. Дополнително, предвидени се околу 3,6 милиони евра за порамнување на претходно исплатени средства како претфинансирање – информираше Министерството за европски прашања.

Средствата се обезбедени врз основа на барањето поднесено од министерот за европски прашања Орхан Муртезани, во кое е опфатена Реформската агенда 2024–2027. Планот опфаќа мерки во повеќе области – управување со јавни финансии, енергетика, деловна средина и владеење на правото.

Според оценката на Европската комисија, целосно се исполнети два чекори: донесувањето на Законот за јавна внатрешна финансиска контрола и измените на Законот за трговски друштва, што претставува 40 проценти реализација. За останатите чекори предвиден е грејс период од 24 месеци, односно до декември 2026 година.

Вкупната алокација за Македонија во рамки на инструментот изнесува околу 17,1 милион евра.