Германија е една од најважните земји во светот кога станува збор за глобалното производство на полупроводници, покажува студијата на Институтот за економски истражувања ИФО и организацијата Еконпол Европа. Кина, Јужна Кореја, Сингапур и Малезија, наводно, произведуваат повеќе од 50 отсто од чиповите со кои се тргува ширум светот. Покрај тоа, Германија, Јапонија, САД и Холандија се меѓу најголемите производители на опрема за производство на чипови.

„Гледајќи не само на трговијата со готови чипови, туку и на производствена опрема и суровини, Германија извезува повеќе отколку што увезува“, рече директорката на Центарот за меѓународна економија ИФО, Лисандра Флах, пренесува Политика.

Трговските податоци покажуваат и дека Кина е главен извозник, особено за сите видови интегрирани кола. Од друга страна, САД, Германија и Јапонија играат важна улога во областа на оптичките чипови и технологијата на сензори, додека Јужна Кореја е лидер на пазарот на мемориски чипови.

„Севкупно, има околу 75 различни типови на полупроводници кои се користат на различни места и чие производство треба да исполни различни барања. Ова високо ниво на сложеност на производството значи дека производството на полупроводници е концентрирано во неколку земји. Ова води до ризик од тесни грла во снабдувањето со сериозни економски и безбедносни последици“, се додава во извештајот на веб-страницата на германскиот институт.