Турскиот министер за финансии Мехмет Шимшек одржа средба со бројни меѓународни инвеститори во Истанбул, што треба да претставува прв чекор кон обновување на врските со голем број значајни компании од други земји. На средбата, која многумина ја сметаа за маратонска, имајќи предвид дека траеше осум часа, учествуваа министерот за финансии, гувернерот на Централната банка на Турција, Хафизе Гаје Еркан и 40 инвеститори. Тема на разговор беше монетарната и фискалната политика и економските перспективи на земјата.

„Средбата означува потранспарентен пресврт на пазарот на турската влада и доаѓа два месеци откако турскиот претседател Реџеп Таип Ердоган го назначи Шимшек за министер и гувернер Еркан“, пишува Дејли Сабах, пренесува Кликс.ба.

Според изворите на овој турски весник, Шимшек нагласил дека намалувањето на инфлацијата е приоритет и самоуверено најавил дека економската политика се враќа на поредовни услови.

„Шимшек им порача на инвеститорите дека Ердоган целосно го поддржува монетарното затегнување и нагласи дека постепеното зголемување на каматните стапки ќе продолжи, што ќе доведе до нешто побавен економски раст, но не и до нагло запирање“, изјави еден од изворите од средбата.

Инаку, Централната банка на Турција, под управа на новиот гувернер, во јуни ја зголеми основната каматна стапка за 900 базични поени на 17,5 отсто. Инфлацијата во Турција во октомври минатата година достигна највисоко ниво во последните 24 години од 85,5 отсто. Со текот на времето, инфлацијата се намалуваше, но во јули таа се задржа на ниво од 48 проценти.