Пушењето наргиле станува сè попопуларно и во Македонија. И додека водените лулиња клокотат во многу кафулиња особено во Старата скопска чаршија, многумина не знаат дека пушењето наргиле е поопасно од пушењето цигари. Од друга страна, иако е забрането, сè повеќе малолетници и кај нас се забавуваат пушејќи ја популарната шиша.

Од Светската здравствена организација предупредуваат дека пушењето наргиле е поопасно по здравјето од цигарите, бидејќи во просек трае од 30 минути до еден час, за разлика од петминутната пауза за цигара, што ја продолжува изложеноста на токсини и штетни хемикалии. Едно наргиле е еднакво на 20 испушени цигари, што значи дека ако децата пушат наргиле еден час, тоа е како сто или повеќе испушени цигари. Иако во минатото се сметаше за егзотично поминување на времето и културен феномен на Блискиот Исток, пушењето наргиле во последниве години се прошири во Европа и во Северна Америка.
Од Државниот пазарен инспекторат за „Слободен печат“ објаснуваат дека тутунот за водено луле (наргиле) e тутунски производ за пушење, кој може да се консумира преку водено луле (наргиле).

– Се состои од тутун со содржина или без содржина на глицерол, ароматични масла и екстракти, меласа или шеќер, ароматизирана или неароматизирана со овошје. Забранета е продажба на тутун и тутунски производи на малолетници и забрането малолетници да консумираат тутун и тутунски производи, според Законот за заштита од пушење – велат од ДПИ.

Наргиле најчесто пушат младите од 18 до 24 години, но и децата. За разлика од тутунот во цигарите, тутунот од наргиле може да има различни вкусови, што им се допаѓа на помладите генерации.

– Овој тутун произведува ароматичен чад, кој е полесен и попријатен за вдишување од тутунот. Иако сè уште се спроведуваат истражувања за здравствените ефекти од пушењето наргиле, прелиминарните наоди покажуваат дека тоа секако не е безопасно. Со пушење наргиле се внесува значително поголемо количество чад, катран и никотин во споредба со цигарите, покажа истражувањето од 2016 година – посочуваат светските експерти.

Не постои конкретна регулатива за употреба на наргиле на паневропско ниво, за бугарските медиуми, неодамна посочи директорот на Европскиот центар за следење дроги Алексис Гусдиел, секоја држава сама одлучува дали да ја ограничи употребата на наргиле за малолетници. Според него, младите користат наргиле, главно за пушење, а се заведени со тврдењата дека е побезбедно за здравјето. Особено е опасна употребата на јаглен во целиот процес на пушење наргиле.

Акцизата за 1 килограм тутун за водено луле е 2.175 денари

Според Законот за тутун, производи од тутун и сродни производи од 2019 година, на пазарот се воведоа нови тутунски производи (тутун за водено луле, тутун за џвакање и тутун за шмркање и несогорлив тутунски производ), а за нив се плаќа акциза. Акцизите се различни и ќе се зголемуваат секоја година.

Според Законот за акцизи, акцизата на тутунот за водено луле (тутун за наргиле) изнесува 2.175 ден по килограм нето-тежина.

На 25 април годинава, царинските службеници на граничниот премин Табановце на влез во државава спречија обид за криумчарење на 30 килограми ароматизиран тутун за наргиле. Со ова беше спречен обид на пуштање во промет акцизна стока за која е избегнато плаќање давачки во износ од над 65 илјади денари.