Традиционалните имиња на храна од животинско потекло да бидат заштитени и да се користат само за месни производи, а не и за оние од растително потекло. Тоа се однесува на стековите, колбасите, ќебапите, ќофтињата и многу други.

За таа цел, за време на состанокот на Советот на ЕУ за земјоделство и рибарство на 23 и 24 јуни 2025 година, чешката делегација ја презентираше иницијативата, потпишана од дванаесет земји-членки на ЕУ. Неа ја предводат Чешка, Австрија, Унгарија, Италија и Словачка, а ја поддржуваат Франција, Ирска, Луксембург, Малта, Португалија, Романија и Шпанија. Овие земји бараат ЕУ да воведе построга законска заштита за традиционалните имиња на храна од животинско потекло, така што овие имиња не можат да се користат за храна од растително потекло, објавува билтенот „Месо“ на Бугарската асоцијација на преработувачи на месо, пишува АгроТелеграф.бг.

Веќе неколку години на ниво на ЕУ се води жестока дебата за употребата на имињата „месо“ и „млечни производи“ за храна од растително потекло. Што се однесува до имињата на млечните производи од растително потекло, како што се „млеко“ или „јогурт“, дебатата во голема мера беше решена на 14 јуни 2017 година, кога Судот на правдата на Европската Унија ја донесе својата пресуда во случајот Toфу Таун.

Новата иницијатива, предводена од Чешка, забележува дека „пазарот на храна на ЕУ сè повеќе се состои од производи што се направени целосно од растителни состојки и се слични по изглед, вкус и конзистенција со оние од животинско потекло“ и дека „храната од растително потекло многу често се етикетира со имињата на месо, јајца, мед, риба и производи добиени од нив“. Иницијативата тврди дека „производите од растително потекло значително се разликуваат од храната од животинско потекло, особено во однос на нивниот состав и хранлива вредност“.