Министерот за економија Бесар Дурмиши најави построги мерки доколку трговците драстично ги зголемат цените. Тој рече дека Пазарната инспекција до крајот на месецов ќе врши вонредни и редовни контроли, по што ќе достават извештај до Владата и министерството за економија, па ако се утврдат девијантни однесувања и енормно зголемување на цените ќе следат ригорозни мерки.

„Ако биде во стабилна фаза, ќе бидеме во комуникација со Пазарна и ќе има редовни контроли“ рече Дурмиши на денешната прес-конференција.

Според него благодарение на мерките преземени од почетокот на годината, вклучувајќи го ограничувањето на маржите на прехранбени и хигиенски производи, економијата е постабилна и нема енормно зголемување на цените.

„Цените на храна се речиси непроменети, само 0,3 проценти за една година. Ако споредиме март со април 2024 година, имаме дефлација. Ова покажува дека економијата е стабилна, граѓаните не се соочуваат со енормно зголемување на прехрамбените производи“, рече Дурмиши.

Тој најави дека на листате со ограничени маржи ќе се најдат и нови производи.