За да се дојде до квалитетна конфискација, треба да се донесе и квалитетна пресуда, вели првиот човек на Агенцијата за управување со одземен имот, Фатон Асани, објаснувајќи што се случува со конфискуваниот имот на Сеад Кочан, проценет на 17 милиони евра.

– Околу 90 проценти од овој имот е со товар. За да се заштити имотот имаше времена мерка за негово замрзнување. Но излезе дека дел од хипотеките се направени во тоа време, и покрај времената мерка, и затоа ние сега водиме судски процеси за да тие хипотеки се прогласат ништовни – објанува Асани.

Тој вели дека бараат и законски измени во врска со надлежностите на Агенцијата, таа да биде поселедна алка во синџирот, а не да се случува и таа да води судски процеси.

Имотот на Сеад Кочан отиде во Агенцијата за управување со одземен имот откако се донесе правосилна одлука за случајот „Труст“. Управителот на компанијата „Трансмет“, Сеад Кочан, беше осуден бидејќи со лажни документи учестувал и добил тендери за ископ на јаглен и јаловина во РЕК „Битола“ во вредност од  17 милиони евра.