Демократската унија за интеграција (ДУИ) денеска изрази сериозна загриженост поради, како што велат, „офанзивата на злогласниот проект Српски свет“, кој сè почесто се манифестира на официјален начин со присуство и дури со поддршка од претставници на македонските институции.

Во соопштението се наведува дека по прославите во Битола, организирани под превезот на „Солунскиот фронт“, на кои присуствувала и висока делегација од Србија заедно со министри од македонската Влада, на 7 септември на Кајмакчалан следела „скандалозна изјава“ на српскиот министер за одбрана, Братислав Гашиќ. Тој, според ДУИ, говорел за „патот на слободата“ и „враќањето во татковината“ на српската војска на територијата на Македонија.

„Присуството на нашите институции во вакви сценарија е не само тежок историски и политички провокациски чин, туку и обид за релативизирање на суверенитетот на нашата држава, претставувајќи ја Северна Македонија како ‘третата српска република’. Тоа е неприфатливо и претставува директна закана за идентитетот, државната стабилност и евроатлантската ориентација на земјата“, реагираат од ДУИ.

Партијата потенцира дека „Српскиот свет“ е непријателски концепт за Македонија и повторува дека Рамковниот договор, меѓуетничката кохезија и европскиот пат на земјата се единствената гаранција за стабилна и сигурна иднина.

„Северна Македонија не е, и никогаш нема да стане третата српска република“, порачуваат од ДУИ.