„Ахметистите“ немаат време за губење на телевизиски соочувања со „огнените“ за тоа колку сработиле министрите, ниту за онлајн петицијата за смена на првиот вицепремиер Артан Груби и другите од ДУИ, туку лансираа кампања со слоганот: „Да! Тој доаѓа!“, како најават за првиот премиер Албанец.

Груби и министерот за финансии Фатмир Бесими нема да ја прифатат фрлената ракавица од Муса Џафери, претседател на Надзорниот одбор на ДУИ и еден од предводниците на „огнените“, за ТВ-дебата. Неофицијално, повикот за ТВ соочување „ахметистите“ го коментираат како безидејност на „огнените“.

Иако станува збор за сопартијци, евидентно е дека „огнените“ и „ахметистите“ се далеку од помирување. Тие имаат различни приоритети и фокуси на дејствување. И додека Груби и Бесими молчат и не одговараат на предизвикот од Џафери, „огнените“ подготвија онлајн петиција за разрешување на Груби и на министрите од ДУИ.

Од друга страна, „ахметистите“ го преплавија Фејсбук и Инстаграм со слоганот „Да! Тој доаѓа“. Наскоро ќе стане појасно дали ДУИ со кампањата го најавува премиерот Албанец во техничката влада или станува збор за нов проект на интегративците.

Првата кампања со навестување дека интегративците подготвуваат нешто ново беше таа за премиер Албанец во пресрет на парламентарните избори во 2020 година. Тогаш ДУИ го лансираше слоганот: „Премиер Албанец, зошто да не?“ ДУИ тогаш и на социјалните мрежи и на билборди ја промовираше таа идеја и со прашањето: „Кој ќе биде следниот премиер?“ со ликовите на Зоран Зоран тогашен лидер на СДСМ, лидерот на ВМРО-ДПМНЕ Христијан Мицкоски и третиот „лик“, поточно силуета со албанското знаме со заднина. За локалните избори ДУИ по истиот принцип истрча со зелената агенда како најава дека партијата се ребрендира и дека во фокусот на интегративците е животната средина.

Сега, во пресрет на парламентарните избори, партијата на Али Ахмети тргнува со кампања „Да! Тој доаѓа“, а заднината е во темносина боја. Од партијата не откриваат на што се однесува новиот проект.

Техничкиот премиер да биде Албанец, сто дена пред изборите, е дел од договорот за владина коалиција во 2020 година помеѓу тогашниот лидер на СДСМ Зоран Заев и лидерот на ДУИ Али Ахмети, а потоа, според Груби, прифатен и од Ковачевски, а Груби и на шефот на дипломатијата Бујар Османи во неколку изјави го најавија премиерот Албанец.

Двете изјави претходеа на новата кампања на интегративците. Османи во својство на координатор на партискиот огранок во Чаир прв потсети дека наскоро Македонија ќе добие премиер Албанец. Неколку денови по Османи и првиот вицепремиер Груби во гостување на косовска телевизија рече дека договорот помеѓу Ахмети и Заев предвидува во последните 100 дена од мандатот на Владата функцијата да ја извршува Албанец, а на тоа се согласил и актуелниот премиер Димитар Ковачевски. Груби додаде дека тој нема амбиции да биде технички премиер и дека таа одлука е во рацете на лидерот Ахмети.

„Имавме модерна кампања во 2020 година, која одекна во Тирана и во Приштина дека е дојдено времето Македонија да добие прв премиер Албанец. Ова е проект на Али Ахмети, а тој не греши во изборот. Јас немам такви амбиции затоа што сакам да ме паметат по реализацијата на коридорите 8 и 10“, изјави вицепремиерот Артан Груби.

За лидерот на ВМРО-ДПМНЕ Христијан Мицкоски битно е да има предвремени парламентарни избори во мај или во јуни без оглед кој ќе биде технички премиер.

„Ние јавно подадовме рака за предвремени парламентарни избори, дури и се откажуваме од техничка влада, дури не треба воопшто да ја има. Треба веднаш да одиме на избори. Тоа е разумно. Ако ги прашате луѓето дали да има парламентарни, па претседателски избори следната година, односно државата и бизнисот да бидат во грч повеќе од 10 месеци, сигурно ќе ви речат, не. Или сега предвремени избори или заедно во еден трошок претседателски и парламентарни. Подготвени сме за избори, стоиме на располагање, може и со истиве министри и со истиот или некој друг премиер“, одговори Мицкоски на новинарско прашање во врска со изјавата на Артан Груби за Албанец премиер и за молкот од СДСМ за тоа.

Премиерот Димитар Ковачевски пак, не сакa да ги коментира интерните кампањи на ДУИ.

„Jас воопшто немам проблем да има технички премиер Албанец или припадник на која било друга етничка заедница. Секој што е професионален може да ја води техничката влада и тоа ќе се случи кон крајот на следната година, во последните 100 дена пред изборите. А премиер по изборите повторно ќе биде од СДСМ“, рече Ковачевски.