Државната делегација во Ерусалим ја предводи министерот за внатрешни работи Оливер Спасовски, а во состав се министерката за култура Бисера Костадиновска-Стојчевска и директорот на Комисијата за односи со верските заедници и религиозни групи, Даријан Сотировски.

Во црковната делегација се повеќемина свештени лица предводени од шефот на делегацијата на Македонската православна црква – Охридска Архиепископија, Митрополитот Тетовско-гостиварски, г. Јосиф Тодоровски.

На церемонијата „Преземање на Благодатниот оган во Ерусалим” во базиликата на Светиот Гроб во стариот град на Ерусалим, државата Израел, присуствуваат голем број делегации од држави од светот, меѓу коишто, рамноправно со другите делегации, присуствуваат претставници на македонска државна и македонска црковна делегација, соопштија од владината прес-служба.

И покрај оградата на науката, поради натприродниот карактер на појавата, со векови, присутните сведочат за доживувано слегување на несоздадениот Благодатен оган, што го пали кандилото на пресветиот Гроб, без човечка интервенција. Од тоа кандило Ерусалимскиот патријарх пали снопови со свеќи, од коишто понатаму им го дели Огнот на присутните верници, кои го очекуваат, се вели во соопштението.

Македонската државна и црковна делегација, како што информираат од Владата по завршувањето на свечената церемонија се враќаaт во Скопје, пренесувајки го во фенер Благодатниот оган од Ерусалим.

На Меѓународниот аеродром Скопје, државната и црковната делегација е предвидено, со почести да ги пречекаaт премиерот Димитар Ковачевски и свечената црковна делегација на МПЦ-ОА.