Стари проблеми во пресрет на новата грејна сезона. Дрвокрадци продолжуваат да ги соголуваат шумите. Се сече без дозволи на различни локации, меѓу нив и на опожарените предели. Полицијата заедно со вработените во ЈП Национални шуми периодов во неколку наврати пронајдени количини исечено огревно дрво и незаконски транспорт, објави МРТ.
Во последниот случај во село Макреш, Старо Нагоричане дрвокрадци се обиделе да прегазат полициски службеници, одбивајќи да застанат и да им дозволат да извршат контрола на камион. Службениците принудени, испукале предупредувачки куршуми во воздух. Неодамна при бегство на лица беше уништено и возило на шумската полиција.

Од ЈП Национални шуми потврдуваат дека трендот на кражби на огревно дрво не запира, но велат значајно се зголемени конфискациите, што не било случај во минатото. Пријави добиле и вработени во самото претпријатие, кои соработувале со криминалните групи. Дел од нив веќе се суспендирани, добиле прекршочни и кривични пријави. Очекуваат оваа грејна сезона намалување на дрвокрадството.

-Ако од први до шести месец 2024 година во Република Македонија од познат сторител имало одземени некаде околу 165 метри кубни предмети, сега имаме само 74 метри кубни дрво, што значи дека бројката е намалена за 50 отсто – вели Кире Михаилов, заменик-директор ЈП Национални шуми. Колкави се загубите на шумите, ќе покажат анализите. Но она што е сигурно пустошот може да предизвика појава на свлечишта, поплави.