Тредс на „Мета“, новиот ривал на Твитер, направи вистниски бум меѓу социјалните мрежи, барем засега. Вистинското прашање е колку навистина на луѓето им беше потребна уште една нова социјална мрежа.

Триесет милиони корисници само во првиот ден направиле профил на новата социјална мрежа. Шефот на „Мета“, Марк Закерберг, ја опиша апликацијата како „пријателски ривал“ на Твитер. Додека Закерберг и шефот на Твитер, Илон Маск скришно продолжуваат да си разменуваат критики преку социјалните мрежи, обичниот човек е повторно соочен со проблемите кои ги носат нивните миленичиња и фабрики за пари – дезинформации, навредливи содржини, расизам, дискриминација…

Бескрајното скролање низ алгоритмот на социјалните мрежи останува ист и на Тредс. Живеењето со социјалните мрежи го достигна најголемиот подем токму со ТикТок и Твитер, на чело со Маск.

Токсичните содржини ни ги заразија умовите, создавајќи постојана желба за нешто што лесно ќе го заборавиме, ама никогаш нема да нè исполни.

Новата социјална мрежа Тредс не нуди ништо ново од тоа што го имавме и досега. Па додека зборуваме за тоа дали таа ќе му наштети на Твитер или дали Маск и Закерберг ќе се тепаат во римскиот Колосеум, небаре се Брус Ли и Чак Норис од „Патот на змејот“, клучното прашање останува дали навистина имаше потреба од нова социјална мрежа, или пак на луѓето им е потребна пауза од нив?

Во изминативе години имаше неколку обиди да му се најде замена на Твитер. Таков беше и тој на поранешниот американски претседател Доналд Трамп, кој преку „Трут соушл“ на еден начин ги собра во трло своите најлојални поддржувачи.

Твитер претставува најлесна и најпријателска алатка за модерното новинарство. Лесниот пристап до различни содржини од целиот свет (често лажни) навистина помагаат во креирањето различни содржини. Големата борба да се победат дезинформациите на социјалните мрежи продолжува и по лансирањето на Тредс, бидејќи ниту таа социјална мрежа не даде конкретен одговор на овој проблем. Маск и Твитер се обидоа во неколку наврати да ги победат ботовите, но таа битка сѐ уште не е завршена.

Проблем кој остана сериозен за сите социјални мрежи е токсичноста на ситните души зад ситните екрани. Токму поради овој факт некои се откажуваат од нив. Но, мнозинството тонат во светот на токсичните коментари, па на тој начин оваа спирала постојано се продлабочува. Овој проблем секако нема да се реши, сѐ додека зад таквите профили стојат анонимни луѓе.

Со денови може да се зборува за тоа како социјалните мрежи се претворија од алатка за поврзување со луѓето, кои всушност ги познававме или со кои споделувавме заеднички интереси, во аморфна и подуена од реклами јама што ни го џвака мозокот и го плука распонот на вниманието. Расте огорченоста и недовербата кон апликациите со задушување на пазарот, додека клонирањето на социјалните мрежи, како што тоа го прави „Мета“, предизвика општо преоптоварување и замор кај корисниците.

Секако, не сѐ што постои на социјалните мрежи е лошо или е осудено да исчезне за неколку месеци. Луѓето веќе се навикнати да живеат со нив, а младите ќе продолжат да бидат опседнати. Но, многу од нив се стремат на „офлајн живот“.

Самиот факт што продажбата на старите мобилни телефони, оние глупавите, лани во САД бележи голем пораст, укажува дека на луѓето им е „смачено“ од подемот на социјалните мрежи.

На „Редит“ страната r/nosurf, која има над двесте илјади и кусур корисници, луѓето си разменуваат начини како да го намалат времето кое го помиунваат скролајќи на социјалните мрежи.

Социјалните мрежи и понатаму ќе го диктираа начинот на кој луѓето живеат и се едуцираат за различни теми, ама ќе продолжи и борбата за пронаоѓање на вистината.