Нигеријка го постави Гинисовиот светски рекорд за изработка на најдолгата перика. Хелен Вилијамс изработила перика која се протега до 351,28 метри, пренесува Би-Би-Си.

Таа потрошила 11 дена и два милиони нигериски наири (2.500 долари) за да ја создаде фризурата. Потребни и биле илјада снопови коса, 12 конзерви лак за коса, 35 шишиња лепак за коса и 6.250 штипки.

„Ова достигнување е едно од најдобрите работи што ми се случиле. Сè уште не можам да верувам во тоа“, рече таа.

И покрај тоа што се занимава со перики осум години, таа рече дека тоа не е лесна задача бидејќи се чувствувала „исцрпено“ за време на процесот.

„Пријателите и семејството ме охрабрија. Не сакав да ги изневерам, па го задржав мојот фокус. Резултатот е најдолгата рачно изработена перика во светот“, рече таа.

По завршувањето на периката, било тешко да се најде место за да се постави и прецизно да се измери. Таа избрала да ја постави на автопат што ги поврзува градовите Лагос и Абеокута на 7 јули. Гинисовата книга на рекорди го потврди рекордот во вторникот.