Со потпишување меѓусебен договор за соработка промоција Комората на сметководители на Македонија при ССК и Комората на проценувачи ќе се унапредуваат демократските вредности во сферата на заеднички интерес. Целта е креирање на платформа за заедничко делување со особен акцент за подобрување на квалитетот на работа, на националната легислатива.

Договорот го потпишаа претседателот на Комората на сметководители, Драган Митковски и претседателот на Комората на проценувачи, Антонио Георгиев.

– По примерот на европските земји ќе се вложиме за примена на европските практики во начинот на работа со цел подигнување на угледот и конкурентноста како на сметководителите, така и на проценителите, изјави Митковски.

Во фокусот на заедничката соработка, додаде, ќе биде промоција на европската легислатива, европските законски одредби, стандарди и регулативи и развој на заедничко учество на меѓународни проекти за квалификација, обука и истражување од европските и националните фондови.

Претседателот на Комората на проценувачи Георгиев истакна дека со овој договор и зацртаните цели за реализација во периодот кој следи ќе се придонесе кон унапредување на работата на двете комори и членовите кои се занимаваат со овие дејности.