Додека американската морнарица се занимава со контрoверзите околу последиците на вирусот корона и епидемијата, која се појави на американскиот носач на авиони „Теодор Рузвелт“ на кој заболеа 200 морнари, Кина ги продолжува своите воени операции во Јужното кинеско море.

На официјалниот сајт на Народната ослободителна армија на Кина, објавено е дека кинеската морнарица спроведува масовни поморски маневри, во кои бил потопен и виетнамски рибарски брод.

Кинеските воено-поморски вежби се одржуваа кон крајот на март, иницирани од сè почестите упади на американската морнарица во овие меѓународни територијални води, за чија граница водат спор Кина и Јапонија. Во вежбите беа вклучени воени бродови, подморници и борбени авиони, а имаа за цел да ја покажат борбената готовност на кинеската морнарица и нејзината способност ефикасно да ги контролира овие територијални води.

Вежбите беа одржани откако американскиот носач на авиони „Теодор Рузвелт“ транзитираше низ овие територијални води кон американската воена база Гуам каде беше неочекувано засидрен. Причина за ова засидрување беше епидемијата која се појави на бродот меѓу морнаричкиот персонал. Евидентирани се 170 заболени од коронавирус, а околу 2000 од вкупно 4000 персонал беше испратен на тестирање.

Поради епидемијата на бродот разрешен беше капетанот, а оставка поднесе и секретарот на морнарицата во Пентагон. Инаку според првичниот план, носачот на авиони требаше да има постојано присуство во овие територијални води, со цел да ја оневозможи Кина да ги присоедини тамошните наоѓалишта со нафта кон својата територија.

Американската морнарица соопшти дека заболени од коронавирус се регистрирани и на носачот на авиони ,,Роналд Реган“, кој исто така патролира долж јапонско- кинеската поморска линија и чија матична база се наоѓа во Јапонија. Според Пентагон, бројката на заразени американски морнари од двата носачи на авиони и во базите Сасебо и Јокосука, во Јапонија, изнесува 1500 лица.

Во обид да го запре ширењето на инфекцијата, Пентагон нареди запирање на сите воени формации и борбени трупи, низ сите бази во светот и ги откажа сите претходно планирани воени вежби како и обуката на новите воени регрути.

Веќе подолго време морнариците на Кина и на САД изведуваат воени маневри во јужното кинеско море со цел да направат тактичка предност околу овој поморски реон, богат со нафта. Според повелбите на ОН, Кина полага право на просторот околу Јужното кинеско море од два милиони квадратни километри и ја смета како суверена територија. Од друга страна, суверенитетот го оспорува Јапонија која смета дека овие територијални води се под јапонски суверенитет.

Јапонија со помош на САД се обидуваат да ги заземат овие енергетски ресурси, а Вашингтон го обвинува Пекинг дека ги милитаризира тамошните острови со донесување на големи воени сили и нивно распоредување.

Но, се чини дека коронавирусот засега ќе ги отргне Американците од реонот на Јужното кинеско море бидејќи коронавирусот сериозно ја нарушува борбената подготвеност на американската морнарица.