Виенската енергетска компанија Wien Energie и нафтената компанија OMV започнаа проект за длабинско дупчење во Виена, со цел до 2040 година сите граѓани да преминат на еколошко греење. По успешно завршените работи, започнува тест-фазата на пумпање топла вода од длабочина од 3.000 метри.

Водата ќе биде тестирана за да се утврди нејзината температура, хемиски состав и количина, а доколку тестовите бидат успешни, планот е да се загреат дури 20.000 домаќинства со геотермална енергија од 2028 година. Ули Зима, член на градската влада, истакнува дека овој проект „го прави централното греење одржливо чекор по чекор“.

По тестот за пумпање, во текот на зимата 2025/26 година, ќе следи пробна работа во затворен циклус, каде што водата ќе се пумпа и враќа под земја во исто време. После тоа, ќе започне изградбата на централата.

Директорите на „Виен Енерџи“ најавуваат дека планот е да се обезбеди одржливо греење за дури 200.000 домаќинства до 2040 година со помош на неколку централи. Компаниите планираат до седум геотермални проекти на повеќе локации во Виена.

Заинтересираните граѓани можат да ја посетат изложбата во инфо центарот за да добијат информации за проектот. Посетата е бесплатна.