Извршниот директор на Мерцедес-Бенц, Ола Келениус, изјави дека планот на Европската Унија за забрана на продажба на нови автомобили со мотори со внатрешно согорување до 2035 година претставува сериозна закана за целиот пазар. Тој верува дека оваа ригидна забрана може да предизвика хаос, од панично купување бензин и дизел пред крајниот рок, до нагло намалување на побарувачката потоа.

Во интервју за Handelsblat, Келениус истакна дека, со веќе слабата продажба на електрични возила (EV) и силната конкуренција од Кина, овој потег дополнително го загрозува опстанокот на европските производители. Наместо целосна забрана, Келениус предлага транзицијата да се поддржи преку даночни олеснувања и пониски цени на електричната енергија на станиците за полнење, така што преминот на електрични возила ќе биде економски одржлив.

„Декарбонизацијата е неопходна, но мора да биде технолошки неутрална и економски одржлива“, рече Келениус.

Во исто време, Мерцедес-Бенц ја менува својата деловна стратегија. Компанијата повеќе не сака исклучиво да се позиционира како луксузен бренд, туку се свртува кон поширока група клиенти. Затоа, терминот „луксуз“ ќе биде речиси целосно отстранет од внатрешната комуникација на компанијата.