Ја поддржуваме Украина од самиот почеток на војната, всушност уште од 2014 година кога Крим беше анексиран од Русија, а кога не многу земји покажаа загриженост за тоа, вели заменик министерот за надворешни работи Зоран Димитровски во интервју за Укринформ.

Димитровски пред два дена присуствуваше на Молитвениот појадок организиран од украинскиот претседател Володимир Зеленски, каде беа присутни 1000 гости, од кои 350 странски претставници.

Во интервјуто, тој зборува за тоа како Македонија ги гледа гаранциите за мир за Украина, перспективите за заеднички воени вежби и заканата што ја претставува руската пропаганда на Балканот.

– Нашата солидарност и поддршка за Украина се многу важни за нас, не само морално, туку и политички. Истиот ден кога Путин ја започна својата агресија против Украина, тој подоцна го оправда тоа тврдејќи дека Украина не е суверена нација, па дури и го доведе во прашање украинскиот идентитет – сугерирајќи дека Украинците, според него, се во суштина Руси кои случајно станале Украинци. И знаеме дека овој наратив е ужасен, а всушност го доживуваме со години, бидејќи и македонскиот идентитет беше негиран од некои од нашите соседи, нашиот јазик беше негиран, како што е негиран вашиот јазик“ рече тој.

Димитровски наглси дека Македонија е петтата нација меѓу членките на НАТО што дала најголема воена поддршка за Украина, според БДП по глава на жител.

„Ние не сме Германија и Франција, не можеме да ви дадеме многу пари или многу воена опрема, но ако го сметате БДП по глава на жител, ние сме петтата нација меѓу членките на НАТО што дала, не само воена, туку и хуманитарна поддршка“ посочи тој, потсетувајќи дека во дадената помош се и хеликоптери кои Украина ѝ ги даде на Македонија во 2001 година.

Тој рече дека со нетрпение го очекува состанокот меѓу Зеленски и Путин, со цел да се постигне траен и праведен мир. А тоа, како што додаде, го вклучува територијалниот интегритет на Украина.

„Разбираме дека има територии под окупација, а исто така разбираме дека е многу тешко да се избрка Русија од овие територии кои се окупирани од нивна страна. Силно го поддржуваме принципот на територијален интегритет како фундаментално меѓународно правило. Секоја промена на границите, доколку биде легитимирана од меѓународни тела, би поставила опасен преседан – што би им отежнало на другите земји да се спротивстават на идните случаи на сецесија или окупација. Ваквите дејствија би биле без преседан и дестабилизирачки“ вели Димитровски.

Од суштинско значење, според него е Украина никогаш да не ги признае овие територии како изгубени. Тој вели дека никој не знае што ќе се случи по 10, 15, 20, 40 години, но што се однесува до гаранциите, Украина треба да ги добие најдобрите гаранции што може од Европската Унија, западноевропските земји, земјите од НАТО, Соединетите Американски Држави.

„ Особено е важно гаранциите да ги даде најголемата западна сила во светот, САД. И досега, американскиот претседател Доналд Трамп изјави дека Америка е подготвена да даде такви гаранции. Но, генерално, најдобрата гаранција е Украина да влезе во НАТО. Знаеме дека тоа во моментов не е можно“ нагласува тој.

Како членка на НАТО, вели Димитровски, разбираме колку е важно за една земја да биде членка на таква организација, нагласувајќи дека ако Украина претходно била членка на Алијансата, оваа војна никогаш немало да се случи.

Димитровски се осврна и за руското влијание во медиумите на Балканот. Тој го спомена и затворањето на рускиот медиум „Раша тудеј“ и дека во тоа време како новинар, се водел од принципот цитиран всушност од Француската револуција – не треба да има слобода за непријателите на слободата.

„Знаете, слободата на печатот е во ред. Сите ние сме против цензурата. Но, ако некој е непријател на слободата, каква слобода очекува од нас? Значи, многу луѓе кои се сметаа себеси за либерали ме нападнаа и ми рекоа – треба да прочитате сè, дури и ако е „ѓубре“, а потоа треба сами да одлучите. Јас реков, да, секако, треба да прочитате сè. Но, ние, како новинари, имаме малку повеќе разбирање за тоа што се случува во светот. Но, обичната јавност можеби не знае, може да ги добие наративите дека Русија или кој било друг е агресивен таму во светот во поинаква ситуација и луѓето можат да го проголтаат тоа затоа што немаат, да речеме, експертиза во разбирањето на тоа што се случува.“ вели Димитровски.

Тој појасни дека Северна Македонија била изложена на многу проруски наративи преку медиумите на српски јазик.

„ Русија отсекогаш се сметала за противник на Македонија, па затоа јавното расположение кон Русија е во голема мера негативно. Од друга страна, Северна Македонија е стратешки партнер на Соединетите Американски Држави, членка на НАТО и е во согласност со Европската Унија. Нашите односи со Русија никогаш не биле особено блиски, освен некои претходни економски врски“ порача Димитровски, додавајќи дека се надева во иднина дека ќе соработуваме со сите земји.

Тој потсети дека Македонија гласала за сите пакети санкции што Европската унија ѝ ги воведе на Русија и дека ќе продолжи да го прави тоа сè додека нема мировен договор на маса.

Фото:Укринформ