Околу 100 луѓе останаа без работа откако ЈСП „Скопје“ го раскина договорот со приватните автобуски превозници „Макекспрес“, тврди првиот човек на оваа групација на приватни автобуски превозници Милорад Димитријевски.

Според него, вчера тие добиле писмено известување дека договорот кој го имале со Град Скопје односно со ЈСП „Скопје“ им е раскинат и дека веќе денеска тие како „Макекспрес“ како што вели се во комуникација со адвокати и правници за како што вели да ги утврдат чекорите кои би ги превземале понатаму околу решавањето на новонастанатата ситуација со јавниот градски превоз во Скопје.

– Во известувањето кое го добивме, како причина за раскинување на договорот од страна на ЈСП „Скопје“ е наведено дека на една линија е реализиран 80 одсто од возниот ред. Во моментов ЈСП „Скопје“ нас ни должи околу 30 милиони денари, средства, кои наскоро се надеваме дека ќе ни бидат исплатени бидејќи ние превезувавме патници – вели Димитријевски.

Инаку, откако вчера и официјално им беше раскинат договорот на приватните автобуски превозници од „Макекспрес“ од ЈСП „Скопје“ излегоа со информација дека тие како Јавно сообраќајно претпријатие ќе ги покријат линиите 19, 20, 22, 52 и 54 со свои возила и покрај раскинатиот договор со приватниот превозник , кој во изминативе години ги опслужуваше посочените линии..

– Возниот ред, трасите и постојките на линиите остануваат исти, единствено наместо возила на приватниот превозник, петте линии ќе ги опслужуваат возила и возачи на ЈСП „Скопје“. Договорот со приватниот превозник „Макекспрес“ се раскина поради непочитување на обврските од договорот со кој беа уредени условите за начинот на јавен превоз – стои во објавата на Јавното сообраќајно претпријатие.