Градските власти во јужна Кина ги повикаа жителите да се држат настрана од водите додека се обидуваат да лоцираат и фатат десетици крокодили кои избегале од фарма за време на поплавите. Исчезнувањето на сијамските крокодили, меѓу кои 69 возрасни и 6 младенчиња, е потврдено по невремето што го погоди суптропскиот град во саботата и неделата.

Властите „се обидуваат да ги држат работите под контрола, но бројот на избеганите крокодили е малку превисок“, соопшти регионалната канцеларија за итни случаи, пренесува Вашингтон пост. На жителите на јужната област Маонан во градот, главна база за аквакултура на слатководни води, каде што се наоѓала крокодилската фарма, им било кажано да останат внимателни и да избегнуваат излегување, особено да се држат подалеку од реки, езера и акумулации.

Видеата објавени на Доујин, кинеската платформа на ТикТок, покажуваат како крокодили се движат по поплавен пат околу езеро во Маоминг. Официјален претставник на градскиот оддел за итни случаи, кој сакал да остане анонимен, потврди дека се пронајдени повеќе од десетина избегани крокодили, но дека „повеќе од 50 можеби се уште се на слобода“.

Во потрагата се мобилизирани полицајци, пожарникари и итните служби со опрема за подводни сонари, а повеќе екипи патролираат на моторни чамци. „Не сме сосема сигурни каде се“, нагласил полицаец што учествувал во потрагата. На паравоените сили стационирани во областа им е наредено да го убијат секој крокодил што ќе излезе од зоната на длабоки води, објави „Саутерн Метрополис дејли“.

Предупредувачки знаци се поставени околу поплавените фарми. Маоминг и пошироката провинција Гуангдонг биле погодени од два тајфуни за две недели, а Саола и Хаикуи направиле хаос низ Тајван и јужна Кина. Во одроните предизвикани од силните дождови во неделата и понеделникот загинале најмалку седум лица во соседниот регион Гуангкси, објавија денеска државните медиуми.

Маоминг има некои од најголемите фарми за крокодили во земјата, со капацитети за производство на кожа од крокодил во околните градови. Месото од крокодил е исто така локален деликатес. Одгледувањето и трговијата со живи крокодили е дозволено според кинескиот закон, а случаите на бегство на одгледувани влекачи не се невообичаени.

Во 2013 година, крокодили избегале од фарма во истиот град, откако бодликавата жица околу фармата зарѓала и станала кршлива поради долготрајните поплави. Два месеци подоцна, неколку десетици крокодили избегале од заграден простор во градот Шанту по поплава.