Поранешниот претседател на Државната изборна комисија, Оливер Деркоски кој е и советник на министерот за внатрешни работи, Панче Тошковски повторно доби ослободителна пресуда за набавката на софтверот за изборите.

– Во однос на предметот со КОК бр. 124/24 поврзан со истрагата за Државната изборна комисија, истиот е првостепено завршен со ослободителна пресуда и е во фаза на изготвување на писмената пресуда по која странките имаат право на жалба, велат од Кривичниот суд за „Слободен печат“.

Во јули минатата година Кривичниот суд го ослободи Деркоски од обвинението за злоупотреба на службената положба, но Апелациониот суд го врати предметот на повторно судење, па на Деркоски пак му се судеше. Во меѓувреме тој се најде на списокот на советници на министерот Тошковски кого го советува за правни работи.

Случајот се однесува на злоупотреби во врска со 2 набавки и за него Основното јавно обвинителство за гонење организиран криминал и корупција (ОЈО ГОКК) поднесе обвинение во мај 2021 година.

Едната набавка опфатена со обвинението е на софтверот што беше купен за парламентарните избори одржани на 15 јули 2020 година, а другата е на телевизори, на кои требаше да се прикажуваат резултатите од изборите.

Вредноста на двете набавки е околу 21.500 евра, од кои 14.600 евра за софтверот, а 6.700 за телевизорите.

Според обвинението, во овие јавни набавки не се почитувал законски минималниот рок за поднесување на понудите, не биле правилно евалуирани доставените понуди, а Деркоски како претседател не извршил контрола на постапката за евалуација, туку одлучил да ја избере понудата предложена од Комисијата за јавни набавки.

Со обвинението се тврдеше и дека софтверот не бил тестиран пред да се имплементира за да се види дали ги исполнува условите итн.

На 15 јули 2020 година, вечертa кога ДИК требаше да ги објави првичните резултати од предвремените парламентарни избори, веб-сајтот со резултатите беше паднат и никој не можеше да ги следи.

По отворањето на истрагата на Обвинителството, Деркоски тврдеше тие воделе транспарентна и законска постапка.

– Постапката е спроведена законски, а доказ за тоа е и отвореноста на постапката. Вградени се сите сугестии што беа дадени за оваа набавка, не се точни ниту наводите дека не е извршено тестирање, на околу 150 члена им биле пратени упатства и лозинки за да се тестира исправноста – тврдеше тој.