Постапката за набавка на софтверот од Државната изборна комисија (ДИК) беше законска и транспарентна, повтори нејзиниот претседател Оливер Деркоски кој и самиот е меѓу четворицата осомничени во истрагата што ја отвори Обвинителството за гонење на организиран криминал и корупција. Под лупа на ОЈО, покрај него, се најдоа уште тројца членови на ДИК, како и сопственик на фирма.

Дел од фокусот на ОЈО е насочен кон постапката за набавка на софтверот за предвремените парламентарни избори кој чинел 900.000 денари (околу 15.000 евра), а дел за друга набавка во вредност од 350.000 денари.

– Постапката беше спроведена законски и на најтранспарентен начин. Беа земени во предвид сите сугестии што ги добивме и неточни се наводите дека не било извршено тестирање. Неколку дена пред изборите беше направен тест преку повеќе од 100 лица. Тендерот заврши со договор за пониска цена, дециден е Деркоски.

Претседателот на ДИК потсети дека на тендерот за набавка на софтвер пристигнале понуди од две фирми – една во вредност од 900.000 денари, а втората, вели, била речиси четири милиони денари.

Обвинителството, пак, со поинаков став. Во наредбата на ОЈО се наведуваат повреди на Законот за јавни набавки во неколку аспекти.

–  Во временскиот период од февруари до септември годинава, во Државната Изборна Комисија, осомничените како членови на Комисијата за јавни набавки и осомничениот управител и сопственик на правното лице, со неизвршување на своите службени должности при спроведување на постапка за јавна набавка ги повредиле одредбите од Законот за јавни набавки со тоа што не утврдиле дека економскиот оператор не ги исполнува условите за учество во постапката, не спровеле правилна постапка за евалуација на доставените понуди во постапката за јавна набавка, ниту било објавено Известување за поништување на постапката за доделување на договор за јавна набавка во предвидениот законски рок. Исто така, не било извршено тестирање и финален тест на софтверот пред истиот да биде имплементиран и не бил извршен увид во спроведената постапка со преговарање, иако биле должни да го направат истото пред да биде потпишан Договорот, како и да утврдат дека Извештајот од спроведена постапка бил изготвен спротивно на Правилникот за начинот на пополнување на образецот на Извештајот од спроведената постапка, е ставот на кој се темели одлуката за истрага на ОЈО.

Четири члена на Државната изборна комисија се под истрага за спроведените јавни набавки