Директорот на ФЗО Ден Дончев тврди дека не било блокирано купувањето на домашната фирма Диамед од страна на фирмата Диаверум од Шведска, како што тврди поранешната сопственичка на Диамед, Вера Ивановска која поднесе кривични пријави против Дончев и министерот Венко Филипче.

– Не било вршено никакво влијание како што тврди Ивановска. Ние само ја предупредивме шведската фирма дека имаме намера да ги испитуваме околностите под кои Диамед ја добила концесијата. Доколку се утврди криминал може да се одрази и на работата на Диаверум доколку реши да ја купи Диамед, а се докаже дека имало злоупотреба на службената должност при доделувањето на концесијата. Сепак вработен во Диамед беше кумот на Никола Груевски, Ристо Новачевски на чија сметка легнале милиони денари. Диаверум си одлучуваат самостојно, но ние ги предупредуваме дека е можно одземање на концесија, рече Дончев.

Тој рече дека имале две средби со претставници на Диаверум и испратени се две писма.

На прашање дали е точно дека Дончев заедно со Зоран Кичеец вршел притисок наместо на Диаверум, Диамед да се продаде на албанска компанија, директорот на ФЗО тврди дека во врска со продажбата немал ниту една средба со Диамед.

Дончев објасни и дека за добивањето на концесијата на ексклузивни 20 години истрага води Јавното обвинителство. Диамед од 2014 година до сега од ФЗО има добиено 169 милиони евра.

Обвинителството треба да утврди дали криминалците се жртви или измамници, рече Дончев.

Тој тврди дека во случајот со Диамед се криел вистинскиот сопственик.