Поткомитетот на Комитетот за надзор на Претставничкиот дом на САД доцна синоќа гласаше за покана до Министерството за правда да објави евиденција поврзана со милијардерот Џефри Епстин, за која се верува дека го вклучува и Доналд Трамп.

Претседателот на Комитетот за надзор на Претставничкиот дом, Џејми Комер, мора да ја потпише поканата пред таа формално да биде издадена, според правилата на комитетот, објави Си-ен-ен.

Предлогот беше усвоен со 8-2 гласови. Тројца републиканци се здружија со четворицата демократи на поткомитетот, пркосејќи му на републиканското раководство, кое сакаше досиејата на Епстин да ѝ ги остави на администрацијата на Трамп.

Предлогот го поднесе демократската претставничка Самер Ли, која за Си-ен-ен изјави дека „американскиот народ сака транспарентност“.

„Треба да ја испратиме пораката дека без разлика дали сте најнезначајната личност или најмоќната личност во оваа земја, ако извршите кривично дело, ако правите работи што не треба да ги правите, ќе има одредена одговорност. Во моментов, ако не гласаме за ова или ако не ги објавиме овие досиеја, ја испраќаме пораката дека ако сте моќен злоупотребувач, сте покриени“, додаде таа.

Во меѓувреме, „Волстрит џурнал“ објави дека државниот обвинител Пам Бонди го информирала Трамп во мај дека неговото име се појавува „повеќе пати“ во досиејата поврзани со Епстин.

Си-ен-ен појаснува дека името на Трамп не било во фокусот на истрагата, која не пронашла никаква „клиентела“ за Епстин ниту докази дека неговата смрт не била самоубиство.

„Трамп е бесен“: Белата куќа е фрустрирана од извештајот за Епстин