Државата веќе му го одзеде имотот на бизнисменот Сеад Кочан, кој е во затвор поради добивање на незаконски тендер од страна на „Електрани на Македонија“. На местото на неговата компанја „Трансмет“ кај 26 недвижности Катастарот како нов сопственик ја запиша државата, оносно Агенцијата за управување со одземен имот. Одземени се деловни простории, куќи и станови, како и земјиште, објави ТВ24.

Од Агенцијата за управување со одземен имот велат дека останати се само 24 возила. Кој ќе ги земе ќе одлучи стечајниот управител на „Трансмет“ зашто тие се ставени под залог на банките. Дилемата е сега кој има предност за конфискација, државата или банките кои исто така имаат побарувања од Сеад Кочан поради неисплатени кредити.

Според правосилната пресуда на Судот треба да биде конфискуван имот во вредност околу 17 милиони евра, толку колку што изнесува штетата направена врз буџетот, кога Конзорциумот на Трансмет и Силекс неметали го добиле тендерот за ископ на јаглен од РЕК Битола. По продажбата на имотот парите треба да се вратат во државниот буџет.