Директорот на Фондот за здравствено осигурување, Сашо Клековски, информира дека првите пациенти повредени во пожарот во Кочани, кои се лекуваат во странство, ќе бидат вратени во земјава во понеделник. Веќе се работи на планот за нивната понатамошна рехабилитација, вели Клековски.

Вкупната бројка на повредени во катастрофалниот пожар достигна околу 200, од кои 72 пациенти се лекуваат во македонските болници, а 111 во странство. Денеска завршија последните транспорти – тројца пациенти се префрлени во Турција, седуммина во Шпанија, а последниот транспорт со двајца повредени бил во Чешка.

Клековски рече дека сите пациенти се згрижени во најдобри можни услови според тежината на повредите, а македонското здравство максимално пожртвувано го прифатило првиот бран од околу 150 пациенти. Првите транспорти на критично повредените започнале уште во првите 12 часа од несреќата, кон Грција, Бугарија, Турција и Србија, а подоцна беше активиран и механизмот за цивилна заштита на Европската унија.

На терен пристигнаа и медицински тимови од Србија, Израел и Чешка со експертиза за третман на изгореници, кои пружија поддршка на македонските здравствени работници.

Оваа трагедија, како што нагласи Клековски, ќе има долгорочни последици, а во следните години ќе се работи на медицинска, рехабилитациска и психосоцијална помош за сите погодени од настанот.