Кабинетот на британскиот премиер Кир Стармер доживеа реконструкција во петокот по оставката на Анџела Рејнер од функцијата заменик-премиер на Обединетото Кралство, објави Дојче веле.

Рејнер се повлече по независна истрага која утврди дека таа не ги исполнила стандардите што се очекуваат од владини министри поради даночна грешка при неодамнешно купување куќа.

Како дел од промените, Ивет Купер беше назначена за министер за надворешни работи, заменувајќи го Дејвид Лами, кој ќе стане заменик-премиер и министер за правда, соопшти кабинетот на Стармер.

Шабана Махмуд, која досега беше министер за правда, ќе ја замени Купер на функцијата министер за внатрешни работи, преземајќи ја улогата која вклучува справување со илегалната миграција.

Британската влада, исто така, назначи нови министри во ресорите за животна средина, бизнис, домување и труд и пензии.