Барањата на синдикалците не се од сега и траат со години, а опозицијата да не се лепи на нив, порача Трпе Деаноски, претседател на Синдикатот на УПОЗ на вториот ден од штрајкот, заедно со вработените во Министерството за култура и туризам. Според него, ова не е штрајк, како што велат од Владата, туку протест, без да се нанесува штета на работните задачи. Деаноски посочи дека дел од вработените во некои министерства имале притисоци за да не излезат да протестираат, но не сакаше да открие во кои ресори се случува тоа.

-Сегашната опозиција не треба да лови поени со нашите барања, оти не им доликува. Тие имаа 7 години, но наместо да го решат проблемот, направија сè што може да го забранат колективното договарање, па дури ќе останат запаметени како прва влада која поништила Колективен договор. А, актуелната Влада, која вчера оцени дека има политика во нашите протести, ќе ја потсетам дека Синдикаот на УПОЗ и во 2022, 2023, но и лани организиравме 3 штрајка и најмалку 20 протести. Потсетуваме дека на декемврискиот протест на улица излегоа 5.000 работници. Барањата остануваат исти и апелираме до Владата што побрзо да седнеме и да најдеме решение – поентираше Деаноски.

Претставникот на синдикатот на вработените од културата и туризмот, истакна дека имаат недостоинствено ниски примања, а платите на 70 отсто од нив, се под републичкиот просек, додека разликата со платите со другите административци е 30 отсто. Оттаму го поздравија зголемувањето на платите кај нивните колеги од другите органи, но апелираа до министрите и Владата да не дозволат различен третман.

– Државната администрација не смее да се потценува и незјината работа треба да биде вреднувана – велат синдикалците.