Србија која е една од последните сојузници на Русија на европскиот континент бидејќи не примени санкции кон таа земја сега се соочува со зголемено (не)контролирано руско влијание во сите сектори на општеството со кое не може да се справи ниту српскиот претседател Александар Вучиќ, пишува францускиот весник Фигаро а пренесува Нова.рс.

„Тоа влијание е толку големо што почна да му пречи на претседателот на Србија, Александар Вучиќ, кој беше фатен во сопствената стапица“, оценува францускиот весник Фигаро, додавајќи дека „Србија секако ја поддржала резолуцијата на Генералното собрание на ОН на 2 март, која ја осудува руската инвазија на Украина, но останува еден од последните сојузници на Москва на европскиот континент, кој избегнува примена на санкции против Русија“.

Во меѓувреме еден млад руски режисер кој 12 години живее во Белград изјавил дека „Русија ја окупираше Србија без да испука ниту еден куршум“.

Понатаму францускиот весник наведува дека статусот на Косово е еден од главните мостови на влијание на Москва врз Белград, бидејќи Москва го користи правото на вето во Советот за безбедност на ОН за да го спречи Косово да стане членка. Но, Србија првенствено зависи од Русија во енергетскиот сектор. Директно или преку своите подружници, Газпром е мнозински акционер на поранешниот локален нафтен гигант Нафтената индустрија на Србија (НИС). Таа е и главен сопственик на два гасоводи кои носат руски гас до српските домови и индустрија.

Преку својата мрежа на компании, гасниот гигант со години е спонзор на спортски клубови како Фудбалскиот клуб Црвена Звезда и кошаркарскиот клуб Партизан, а финансира и голем број фестивали, институции и културни настани. Фигаро пишува и за тоа како Москва го пренела и руското влијание врз црквата, бидејќи Газпром го финансираше внатрешното уредување на катедралата „Свети Сава“.

Тие активности се дел од „ефикасната кампања која ги слави руско-српските односи и ги таргетира симболите кои имаат големо влијание врз граѓаните“, објасни Игор Новаковиќ од белградскиот Центар за меѓународни и безбедносни прашања (Фонд ИСАЦ).

Руската мека моќ ја користи својата агенција Спутник за да го обликува српското мислење. Вестите на Спутник ги преземаат сите медиуми под контрола на сегашната власт во Србија, а од ноември телевизијата „Русија денес“, забранета во Европската унија, отвори своја канцеларија во Белград.

„Тие придонесуваат за создавање некритична атмосфера кон Русија, славејќи го митот за словенско и православно братство, претставувајќи го рускиот пазар како шанса за српските извозници, и покрај реалните економски показатели, кои докажуваат дека главни трговски партнери на Србија се земјите од ЕУ“, рече. Новаковиќ.

Францускиот медиум во својот текст дава осврт и кон насловните страници во земјата за време на почетокот на руската инвазија врз Украина.

„Украина ја нападна Русија; САД го турка светот во хаос“, беа насловите на српските таблоиди во пресрет на руската инвазија на Украина. Речиси една година подоцна, медиумскиот пејзаж продолжува да дава тежина на таа пропаганда, застанувајќи на страната на Кремљ, кој е претставен како принуден да одговори на заканите на НАТО и на „нацификацијата“ на Украина – пишува Ле Фигаро.

„Тоа е првенствено прашање на дискредитација на Западот и приближување на Србија до Русија“, вели Томас Бреј, автор на извештајот на германската фондација Фридрих Науман за руските медиуми на Балканот.

Фигаро наведува дека именувањето на Александар Вулин во декември минатата година за шеф на српските безбедносни служби (БИА) ги нервирало ЕУ и САД. Доверливиот човек на Вучиќ, поранешниот директор на канцеларијата за Косово, потоа министер за труд, одбрана и внатрешни работи, не ги крие своите афинитети кон Москва“, пишува францускиот весник, цитирајќи ја изјавата на Вулин во август по средбата со шефот на руската дипломатија, Сергеј Лавров, дека „Србија е единствената земја која не подлегна на антируската хистерија“.

И во декември, во Србија беа објавени огласи за регрутирање платеници да се борат во Украина на страната на руските сили, поради гласините за отворање на канцеларија на руската паравоена група Вагнер во Белград. Како што пренесува Нова.рс Фигаро тогаш објави дека во Белград се појавиле графити со амблемот на Вагнер, чиј автор е член на екстремно десничарското движење Народна патрола, кое организираше демонстрации за поддршка на Русија веднаш по почетокот на војната во Украина.

Тогаш мораше да реагира и самиот Вучиќ нагласува медиумот.

Вук Вуксановиќ од белградскиот Центар за безбедносна политика оцени дека српските власти манипулираат со неколку екстремно десничарски партии кои го бранат Кремљ. Тие партии служат како страшило дека властите мора да дејствуваат како бедем против населението кое е премногу симпатично кон Русија.

„Тоа е изговор за нив (властите во Србија) да не усвојат санкции“, додаде тој.

Фигаро ја пренесе и оценката на историчарот Миливој Бешлин, кој вели дека „за Русија Балканот отсекогаш бил резервен фронт, па затоа се работи на тоа да се задржи во состојба на постојана нестабилност“.

Ваквата вистина му се враќа на претседателот Вучиќ како бумеранг. „Не сум среќен поради тоа, но можеби ќе треба да усвоиме санкции против Русија“, рече тој на 2 февруари пред пратениците на седницата за Косово. Останува прашањето како Вучиќ ќе се справи со јавното мислење кое е поволно за Русија, бидејќи според последните анкети 71,08 отсто од испитаниците се против санкциите против Русија.

Инаку за мнозинството Срби, земјата мора да остане неутрална во конфликтот (Украина и Русија), а ако треба да изберат меѓу Западот и Русија, само една третина би се одлучила за западниот табор, додава францускиот весник.