Новиот ривал на „Твитер“, „Тредс“ на „Мета“ направи вистниски „бум“ меѓу социјалните мрежи, барем засега. Вистинското прашање е колку навистина на луѓето им беше потребна уште една нова социјална мрежа.

Триесет милиони корисници само во првиот ден направиле профил на новата социјална мрежа. Шефот на „Мета“, Макр Закерберг, ја опиша апликацијата како „пријателски ривал“ на „Твитер“. Додека Закерберг и шефот на „Твитер“, Илон Маск скришно продолжуваат да си разменуваат критики преку социјалните мрежи, обичниот човек е повторно соочен со проблемите кои ги носи секоја социјална мрежа (дезинформации, навредливи содржини, расизам, дискриминација…).

Zuck is a cuck

— Elon Musk (@elonmusk) July 9, 2023

Бескрајното „скролање“ низ алгоритмот на социјалните мрежи останува ист и на „Тредс“. Живеењето со социјалните мрежи го достигна најголемиот подем токму со „ТикТок“ и „Твитер“ на чело со Маск.

Токсичните и зависни содржини станаа врзани во нашите глави, создавајќи постојана желба за нешто лесно заборавливо што никогаш не нè исполнува.

Новата социјална мрежа „Тредс“ не нуди ништо поново од тоа што досега го имавме на останатите, па додека зборуваме за тоа дали таа ќе му наштети на „Твитер“ или дали Маск и Закерберг ќе се борат во римскиот Колосеум, клучното прашање останува дали навистина имаше потреба од нова социјална мрежа, или пак на луѓето им е потребна пауза од нив?

Во изминативе години имаше неколку обиди да му се најде замена на „Твитер“, таков беше и тој на поранешниот американски претседател Доналд Трамп, кој преку „Трут Соушал“ на еден начин си ги обедини своите најлојални поддржувачи.

„Твитер“ претставува најлесна и најпријателска алатка за модерното новинарство. Лесниот пристап до различни содржини од целиот свет (често лажни) навистина помагаат во креирањето различни содржини. Големата борба да се победат дезинформациите на социјалните мрежи продолжува и по лансирањето на „Тредс“, бидејќи ниту таа социјална мрежа не даде конкретен одговор на оваа проблематика. Маск и „Твитер“ се обидоа во неколку наврати да ги победат ботовите, но таа битка сѐ уште не е завршена.

Проблем кој остана сериозен за сите социјални мрежи е токсичноста која постои зад ситните екрани. Многумина и токму поради овој факт се откажуваат од нив, но уште повеќе на еден начин навлегуваат во светот на токсичните коментари, па на тој начин овој круг постојано се врти. Овој проблем секако нема да се реши, сѐ додека зад таквите профили стојат анонимни луѓе.

За тоа како социјалните мрежи се претворија од алатка за поврзување со луѓето кои всушност ги познававме или со кои споделувавме заеднички интереси, во аморфна и подуена од реклами јама која ни го џвака мозокот и го плука распонот на вниманието, може да се зборува со денови. Постои растечка огорченост и недоверба кон апликациите со задушување на пазарот, додека клонирањето на социјалните мрежи, како што тоа го прави „Мета“, предизвика општо преоптоварување и замор кај корисниците.

Секако, не сѐ што постои на социјалните мрежи е лошо или е нешто што ќе исчезне за неколку месеци. Луѓето веќе се навикнати да живеат со нив, а младите ќе продолжат да бидат опседнати со нив. Но, многу од нив се стремат на „офлајн живот“.

Самиот факт што продажбата на старите мобилни телефони, оние без современите технологии, лани во САД бележи голем пораст, укажува дека на луѓето им е „смачено“ од подемот на социјалните мрежи.

На „Редит“ страната r/nosurf, која има над 212 илјади корисници, луѓето си разменуваат начини како да го намалат времето кое го помиунваат „скролајќи“ на социјалните мрежи.

Социјалните мрежи ќе продолжат да го „диктираат“ начинот на кој луѓето живеат и се едуцираат за различни теми, а борбата за пронаоѓањето на вистината продолжува.