Една стара мудрост вели: „Од коцкање можеш да се збогатиш само ако отвориш коцкарница“. Но, обложувалници, казина и апарати за игри на среќа никнуваат на секој чекор. Минатата година во државава имало 58 правни субјекти што се занимавале со обложување, коцкање, видеолотарија, а вкупниот приход што го направиле е 48.778.104.541 денар, или речиси 800 милиони евра! Толку пари, значи, оставиле граѓаните на оваа забава, која за некого, за жал, е тежок порок.

Како и да е, ниту коцкањето ниту спортското обложување не е забрането, има долга историја во светот, а на компаниите што работат во Македонија им донело чиста добивка од 70,4 милиони евра, покажува анализата на Пари.

Упатените велат дека покрај наши сограѓани, во нашите коцкарници доаѓаат и луѓе од соседството, од Албанија и Косово, каде што веќе се води поинаква политика во однос на овие „куќи на среќата“, а секако тука се и традиционалните гости од Грција. Сепак, бројката е запрепастувачка, а најмногу за неа придонеле нашите сограѓани.

Анархија во организирањето на игрите на среќа

Социологот професор Ѓорѓи Тоновски во изјава за „Слободен печат“ објаснува дека коцкањето е најпроширена и најфаворизирана забава во светот на пониските слоеви, но на неа не се отпорни ни повисоките општествени слоеви.

– Кај нас постои анархија во организирањето на таа, условно кажана, забава. Како што постои анархија во урбанистичките решенија за нашето живеење, исто така постои анархија во однос на местоположбата на коцкарниците. И ние тоа долго ќе го живееме. Тоа е тренд и во целиот свет и јакнее во време на криза. Уште старите Римјани имале една поговорка „Дајте му на народот леб и циркус“. Тоа се случува сега – вели Тоновски.

Тој потсетува дека, за жал, овие игри на среќа создаваат зависност и тогаш зависникот има несоодветно однесување, а страда целото семејство.

– Познавам луѓе што стануваат во три часот сабајле за да разговараат со апаратите, односно со нив се однесуваат како да се живо суштество – вели Тоновски.

Според него, недостасува една поширока акција за да се сузбијат негативните последици од овој тренд. Притоа, потсетува дека и во медиумите може да се прочитаат вести дека во некој објект со апарати за игри на среќа е пронајден малолетник, иако таму им е забранет влезот.

– Видовме едно движење во Тетово кое се обиде да воспостави некаков ред, во однос на оддалеченоста на овие објекти од училиштата. Но, ништо не успеаја. Мислам дека постои силно лоби во општеството, кое ја турка работаа и нема резултати – вели Тоновски.

Два момента што ги „хранат“ коцкарниците

Социологот Илија Ацески вели дека, иако гледа на секој чекор објекти за обложување и игри на среќа, сепак, не очекувал ваква драматична бројката од потрошени 800 милиони евра.

– Постојат два момента во однос на ова што ни се случува, едниот е психолошката криза во која е западнат народот, а другиот е силното влијание да се развива овој бизнис од страна на групи во власта, затоа што тоа е бизнис во кој се вртат многу пари – објаснува Ацески за „Слободен печат“.

Тој вели дека во време на психолошка криза во општеството, коцкањето, во социопсихолошка смисла е како терапија.

– Кога луѓето се наоѓаат во ситуација во која не може да се оттргнат од случувањата во околината, постои момент кога коцкањето служи како терапија. Тука не мислам само на финансиската криза. Тие што се коцкаат неколку часови се оттргнати од реалноста и имаат надеж дека преку ноќ ќе им се смени светот. Секако, тоа не се случува. Не смеат обложувалниците и коцкарниците да бидат толку достапни. На пример, може да ги има во некои елитни хотели. Но, не вака – на секој чекор. Вистинска трагедија е кога ќе видите младо момче да влегува во коцкарница и таму да троши по неколку часови од својот живот. Таа игра е и многу опасна – вели Ацевски.

Во рамките на хуманитарната организација „Даре Џамбаз“ постои советувалиште за одговорно играње. Психијатарот Оливера Суботин Поповска вели дека онлајн коцкањето може да биде поопасно од физичкото коцкање. Таа за Радио Слободна Европа сподели едно свое искуство. Кај неа дошла мајка што побарала помош откако разбрала дека нејзиниот 20-годишен син е во долгови што ги направил со онлајн коцкање, а таа сметала дека е примерно дете што седи и учи на компјутер.

Шест играчници се под капата на државата

Покрај државната лотарија, која има традиција колку и државава, веќе добро е етаблирана и Државната видеолотарија на РСМ – Касинос Аустриа ДОО Скопје, во сопственост на Државната лотарија на С Македонија и на Касинос Аустриа интернационал Македонија. Тие две, според објавеното од Пари, лани направиле приход од 108,9 милиони евра и добивка од 27,4 милиони евра. Од лани работи и Нова државна видеолотарија – НОВО ВЛТ ДОО Скопје, во која како сосопственик се јавува „ХТЛ Македонија“, фирма ќерка на австрискиот гигант во игри на среќа „Новоматик“, но во 2023 година имала приход од само 1.000 евра.
Во јануари Државната лотарија си доби три нови партнери за игри на среќа. „Државна лотарија – Моцарт“ ДОО Скопје се регистрираше на 5 јануари. Партнер е МОЦАРТ ДОО Белград (Палилула). На 18 јануари годинава се основаше „Државна лотарија – Везув“ ДОО Скопје, каде што партнер е „Везув МК“ ДООЕЛ, фирма ќерка на црногорскиот „Везув“. Компанијата за онлајн обложување што го носи името „Државна лотарија – 77 Битс Битола“ е регистрирана на 9 јануари. Партнерството е со „Телематик интерактивна Бугарија“.