Премиерот на Црна Гора Милојко Спајиќ потврди дека владата на таа земја се задолжила на лондонската берза во износ од 687 милиони евра со каматна стапка од 5,8 отсто.

-Вака обезбедените пари ќе се користат исклучиво за враќање на стари кредити, како и за инфраструктурни проекти за развој на државата, изјави Спајиќ на мрежата Х.

Спајиќ рече дека јавноста деновиве била сведок на „страшни и сензационалистички медиумски написи за трансакцијата“ кои, како што вели, „пркоселе на сите правила на Лондонската берза, кои налагаат трансакцијата да не биде јавна додека не заврши целиот процес кога обврзницата може слободно да се тргува на берзата и сите нејзини детали да станат достапни за секого“.

Медиумите објавија дека владата планира да се задолжи од 500 до 700 милиони, а некои аналитичари тврдеа дека владата ќе се задолжува во долари. Министерството за финансии претходно ги демантираше информациите во медиумите дека Владата ќе се задолжува. До крајот на годинава на име стари долгови доспеваат за наплата речиси 657 милиони евра, од кои 519 милиони се главнина, а 138 милиони евра се камати, пишува АлЏезира Балканс.