Хонорарниот ангажман на партиски војници станува дел од системот, вели за „Слободен печат“ професорот од Правниот факултет во Скопје, Борче Давитковски, коментирајќи ги исплатите на илјадници евра за сестрите Бесмира и Фатиме Ејупи, кои биле хонорарно ангажирани од повеќе државни институции и општини.

Според објавеното досега, на сметката на ТВ-презентерката легнале 39 хонорари од Државното правобранителство, од  Државната изборна комисија и од општините Сарај, Петровец, Чаир и Брвеница.

– Јавна тајна е дека во јавниот сектор не се влегува без партиска книшка. Партиските војници што не сакале да добијат функција, се ангажираат со договор за дело и месечно заработуваат како да имаат две министерски плати. За жал, тоа стана дел од системот. Треба доследно да почне да се спроведува Законот за администрација, кој не познава ангажман договор на дело и да се престане со таа практика. Со ваква администрацијата само повеќе тонеме – вели Давитковски.

Ако на Државното правобранителство, како што велат, не им одобриле финансии за нови вработувања, тогаш од каде им пари за исплата на хонорари, прашува Давитковски.

– Ако продолжат вака, ќе пропаднеме како систем. Сè е на штета на остварувањата на правата на граѓаните. Државното правобранителство треба да се грижи за заштита на државниот имот, а не да го растура – вели професорот.

Правобранителството се правда, имале многу работа

Државното правобранителство ги искара медиумите за „шпекулативни напади врз институцијата“ поврзани со несудената конзулка Бесмира Ејупи и нејзината сестра Фатиме. Државниот правобранител Фехми Стафа за „Слободен печат“ одби да одговори на нашите прашања – зошто токму сестрите во повеќе наврати биле хонорарно ангажирани кај нив, на чиј предлог, како и немало ли други квалификувани кадри за таков ангажман.

Откако му пренесе зошто го бараме, секретарката на правобранителот ни одговори дека Стафа нема да одговара на дополнителни прашања и дека сè што имале да кажат е објавено на веб-страницата на Правобранителството. Во нивното соопштение пишува дека нивна основна надлежност и задача е одбрана на државата во голем број судски постапки, односно повеќе од 200 илјади предмети.

„При толкав обем предмети се соочуваме со недостиг на кадар или премал број стручни лица и затоа се ангажираат лица на договор за дело за месечен хонорар, бидејќи институцијата нема финансиска согласност за вработувања на потребниот стручен кадар. Објавувањето лични податоци на граѓани е крајно неетички и неморален чин и претставува повреда на Законот за лични податоци“, велат од Правобранителството.

За нецела година наплатиле повеќе од 17.000 евра

Според објавите во медиумите и во базите на податоци „Отворени финансии“, сестрите Ејупи имале договори за ангажман во повеќе општини и институции, меѓу кои и Државното правобранителство, а за нивните услуги за нецела година наплатиле повеќе од 17.000 евра.

Од Државната изборна комисија (ДИК), каде што Фатиме била ангажирана со договор за услуги за ланските локални избори и за тоа зела 1.000 евра, велат дека била предложена од некоја од партиите на Албанците.

– Ејупи, на предлог на член на ДИК, е ангажирана за изборите како помошно тело за општините Дебар и Центар Жупа. ДИК во време на избори постојано ангажира надворешни лица за организирање и спроведување избори. Не ја познавам Ејупи и не знаев дека таа е ангажирана додека не објавија медиумите. Членовите на ДИК меѓу себе имаат доверба и ги прифаќаат предлозите за ангажман на надворешни лица. Практика е ДИК да ангажира лица од државните институции, пред сè од Собранието, но хонорарно се ангажираат и надворешни лица. Дали, како и што сработила, треба да има во извештајот што до Општина Дебар требало да го поднесе Ејупи – ни изјави претседателот на ДИК, Александар Даштевски.

Државната комисија за спречување на корупцијата неодамна отвори предмет за исплатите од државни институции кон несудената конзулка, презентерката Бесмира Ејупи. Од Антикорупциска за „Слободен печат“ велат дека во тек е постапката за обезбедување на сите документи од институциите што кон Ејупи извршиле трансакции и најавија дека е можно да го прошират предметот, по информациите дека и сестрата на Бесмира хонорарно била ангажирана од буџетски институции.

За Бесмира Ејупи се шпекулираше и дека Владата ја назначила за генерален конзул во Њујорк, без да бидат исполнети законските критериуми за оваа важна дипломатска позиција. МНР и министерот Бујар Османи демантираа, а не излегоа со детали, затоа што е незаконски да се изнесуваат од затворена владина седница.