Двајца мажи, на возраст од 39 и 31 година, се осомничени за брутален напад врз човек во скопското село Орешани, кого го набедиле дека украл лубеници од нива. Тие ќе одговараат за насилство, соопшти Обвинителството

Инцидентот се случил завчера. Додека оштетениот со својот автомобил се движел од Петровец кон селото Таор, осомничените го следеле со товарно возило, сè додека тој не влегол во дворот на куќата на својот внук во Орешани.

„Осомничените пристигнале веднаш по него, излегле од возилото, насилно го извлекле од автомобилот и започнале да го удираат со тупаници и шамари по главата и телото. Вториот осомничен извадил водоводџиски клешти од камионот и продолжил да го удира оштетениот, се додека тој не паднал во бессознание. Нападнатиот добил тешки телесни повреди и се наоѓа во животозагрозувачка состојба. Хоспитализиран е на Клиниката за неврохирургија во Скопје“, информира ОЈО.

Насилството било poсведочено и од внукот на оштетениот, кој во моментот бил присутен во дворот. Според Обвинителството, овој чин предизвикал страв и чувство на несигурност кај сведокот и пошироката јавност.

„Со ваквиот начин на извршување на делото, кај сведокот и јавноста е предизвикано чувство на загрозеност, страв и нарушена безбедност“, велат од ОЈО.

Ценејќи ги сериозноста на делото и ризикот од бегство или повторување на насилството, јавниот обвинител поднел предлог до Основниот кривичен суд Скопје за определување мерка притвор за двајцата осомничени.