Членовите на ирскиот рок-бенд „Ју ту“ проговорија за ситуацијата во Појасот Газа, изразувајќи длабока загриженост поради хуманитарната блокада, плановите за воено преземање на градот Газа и непропорционалното страдање на цивилите. Во долгото соопштение за медиумите, секој член на бендот ги изнесе своите лични ставови, повикувајќи на прекин на непријателствата и итен пристап до помош за населението.

„Луѓето долго време беа ужаснати од она што се случува во Газа, но блокадата на хуманитарната помош, а сега и плановите за воено преземање на градот Газа, го однесоа конфликтот на непозната територија. Ние не сме експерти за политиката на регионот, но сакаме нашата публика да знае каде стои секој од нас“, рече фронтменот Боно, потсетувајќи се на нападот врз музичкиот фестивал Нова на 7 октомври, за кој рече дека го изненадил додека бендот свирел во Лас Вегас.

Зборувајќи за неговото претходно избегнување директен коментар за политиката на Блискиот Исток, тој истакна дека, како коосновач на кампањата „ONE“ за борба против СИДА-та и екстремната сиромаштија во Африка, претходно се фокусирал на кризите во Судан и Етиопија, кои едвај се појавуваат во вестите и покрај огромниот број жртви и хуманитарната катастрофа.

Боно рече дека сликите од гладните деца во Газа го потсетиле на патувањето во Етиопија со неговата сопруга Али пред 40 години каде што биле сведоци на луѓе погодени од глад предизвикан од човекот.

„Кога масовното страдање на цивилите, особено децата, изгледа толку пресметано, зборот зло не е претерување“, рече тој, додавајќи дека „силувањето, убиството и киднапирањето на Израелци на фестивалот Нова беше зло, како и сегашната употреба на гладот како оружје – од страна на Хамас, но и од страна на Израел“.

Тој остро го осуди израелскиот премиер Бенјамин Нетанјаху и неговата крајно десничарска влада, велејќи дека нема оправдување за бруталноста врз Палестинците, ниту во Газа ниту во Западниот Брег.

Тој ги цитираше изјавите на министрите во кои се повикува на целосно уништување на Газа и забрана за каква било помош и рече дека најавата за воено преземање на градот Газа е еуфемизам за колонизација.

„Нашиот бенд е во солидарност со палестинскиот народ кој бара мир и коегзистенција со Израел и нивното легитимно барање за држава. Ние, исто така, стоиме со преостанатите заложници и повикуваме на разумна преговарачка иницијатива за нивно ослободување“, рече Боно, додавајќи дека бендот донира на организацијата „Медицинска помош за Палестинците“.

„Длабоко сме шокирани и потресени од страдањето во Газа. Она што го гледаме не е далечна трагедија – тоа е тест за нашата заедничка човечност“, рече гитаристот Еџ.

Тој му постави на израелскиот премиер три прашања: дали верува дека такво намерно и немилосрдно уништување на цивилното население може да се случи без генерациски срам; дали верува дека отстранувањето на Палестинците од Газа и Западниот Брег е пат кон мир или е етничко чистење; и ако тој отфрли решение со две држави, каква е неговата политичка визија – траен конфликт, трајна нееднаквост или апартхејд?

„Мирот не се постигнува преку доминација, туку со признавање на еднаквото достоинство на сите, дури и на оние од кои некогаш се плашевме или ги презиравме. Нема мир без правда“, рече Еџ.

„Одмазда врз цивилите“

Басистот Адам Клејтон рече дека хуманитарната криза во Газа изгледа како одмазда врз цивилите кои не се одговорни за нападот на Хамас на 7 октомври.

Тој предупреди дека колонизацијата на Газа трајно ќе ја уништи секоја можност за мир и оцени дека израелската армија, и покрај својата технолошка супериорност, бомбардира цивили и неселективно уништува инфраструктура.

„Зачувувањето на животите на цивилите е избор во оваа војна“, нагласи тој.

Тапанарот Лари Милен го опиша масакрот на фестивалот Нова како „ужасни сцени што донесоа само повеќе страдање“ и рече дека очекува воен одговор од Израел, но не и неселективно уништување на повеќето домови и болници во Газа и намерно гладување.

„Тешко е да се разбере како кое било цивилизирано општество може да помисли дека гладните деца ќе помогнат во некоја кауза. Тоа е нехумано и криминално“, рече тој, прашувајќи каде е негодувањето во Израел и меѓу дијаспората.

„Молчењето не му користи на никого“, рече Лари, повторувајќи ја својата поддршка за правото на Израел да постои, но и за правото на Палестинците на сопствена држава.

Бендот „Ју ту“ ја објави изјавата на своите социјалните мрежи, а судејќи според коментарите, мислењата на обожавателите за нивниот став за Газа се поделени, пренесува „Н1“.