Огромна зграда висока 15 ката ќе се гради на паркинг-просторот спроти „Ист гејт мол“ – Општина Центар му издала дозвола на градежниот могул Ванчо Чифлиганец, кој најавува дека во изградбата ќе вложи 90 до 100 милиони евра, а зградата очекува да се изгради за две години. Објектот ќе биде поделен на три дела – на аголот ќе биде највисокиот дел од 15 ката, другиот станбен објект од 11 и бизнисцентарот од седум ката.

Наспроти поплаките од граѓаните дека со изградбата на блискиот мол веќе е целосно закрчен сообраќајот во тој дел од Скопје и дека неговиот објект дополнително ќе ја влоши состојбата, Чифлиганец за „Телма“ објаснува дека изградбата е целосно законска и дека тоа што се гради ќе биде „најелитниот, најхуманиот елитен станбен деловен комплекс со еден бизнис-центар“.

„Оваа градежна парцела беше нелегално паркинг бесплатен. Значи 20 години јас, луѓето што се паркирале овде бесплатно го користеле. 20 години овој плац го чистам од ѓубре, за жал и шприцеви наоѓаме често и седум години имаше мораториум со промена на дупот. Општина центар го намали го направи похуман. Јас од ова место тврдам, најелитниот, најхуманиот елитен станбен деловен комплекс со еден бизнис центар ќе биде на ова место. Затоа што имаме 320 паркинг места, имаме 230 места за велосипеди, се градат 190 стана и 20% зеленило“, вели за Телма Ванчо Чифлиганец „Адора инженеринг“, вели Чифлиганец во изјава за телевизијата.

За изградбата на објектот, тој тврди дека платил комуналии од околу пет милиони евра.

„Доколку некој смета дека ова не е во ред, Ванчо Чифлиганец и неговата сопствена компанија, респектирана, „Адора инжинеринг“, нека се вратат петте милиони евра, јас ќе ја напуштам земјата. Јас сакам да творам во мојата земја Македонија“, вели Чифлиганец.

Според Деталниот урбанистички план, објектот ќе има максимална висина од приземје плус 18 ката. Издадената градежна дозвола е во согласност со параметрите на ревидираниот ДУП, донесен во јули минатата година.