Професорот Андон Чибишев од Универзитетската клиника за токсикологија апелира до граѓаните и до професионалците да не гаснат пожари доколку немаат соодветна заштитна опрема.

„Жал ми што повторно морам да предупредам дека е крајно ризично, а и дека не треба да се вклучуваат во гаснење на пожари граѓани кои на никаков начин не се заштитени од штетното дејство на чадот и на отровните гасови. Јаглеродниот моноксид и цијанводородот убиваат без предупредување,“ вели Чибишев.

Тој додаде дека е неопходно да се користат заштитни средства при интервенции во вакви ситуации.

„Ги молам граѓаните, па и професионалците, да користат заштитни средства и да бидат крајно внимателни бидејќи последиците од труење со отровните гасови можат да бидат многу сериозни,“ предупреди професорот.