Претседателот на УЕФА, Александар Чеферин, во искрено интервју се осврна на прашањето за враќањето на руските репрезентации во меѓународните фудбалски натпревари, но и на контроверзите поврзани со третманот на израелските екипи во контекст на актуелните конфликти.

Чеферин откри дека постоела иницијатива за дозвола руските младински репрезентации до 17 години повторно да се натпреваруваат, но таа идеја брзо била отфрлена поради силен политички отпор и внатрешен притисок врз Извршниот комитет на УЕФА.

Се надевавме дека можеме барем да ги вратиме младите – момчињата и девојчињата. Но, наидовме на политичка хистерија. Членовите на одборот беа подложени на жестоки лични напади. Не се откажаа од идејата, но нè замолија да почекаме. Јасно е – додека трае војната, Русија нема да се врати – изјави Чеферин.

Тој исто така зборуваше и за израелско-палестинскиот конфликт, истакнувајќи дека во случајот со Израел не постои ист тип на политички притисок како што имаше за Русија, туку иницијативите доаѓаат главно од граѓанскиот сектор.

„Искрено, срцето ми се кине кога ги гледам страдањата на цивилите. Но, никогаш не сум бил поборник за казнување спортисти. Тие не можат да ја запрат војната. Ги исклучивме Русите, а конфликтот сè уште трае. Во случајот со Украина, реакцијата беше политички наелектризирана. Сега е повеќе прашање на притисок од јавноста, а политичарите се, да бидеме искрени, многу прагматични кога станува збор за војна и страдање“, вели Чеферин.

Словенечкиот функционер повтори дека лично не е за исклучување на спортисти од меѓународните натпреварувања, но признава дека конечните одлуки често зависат од пошироки политички и општествени околности.

 Не знам што ќе се случи понатаму, но за сè се дискутира. Моето лично мислење е дека спортистите не треба да бидат жртвени јарци – заклучи Чеферин.