Денес, во салата на Советот на Општина Битола се одржа вториот состанок на работното тело во поширок состав, на кој претставниците од стручната фела дадоа одговор на прашањата кои претходно беа поставени а се однесуваат на изготвувањето на новата Програма за поставување на урбаната опрема, со цел кафулињата на Широк Сокак да добијат изглед со кој нема да се нарушува автентичноста на најамбиенталната улица.

Стручната фела заклучува дека потребно е ревидирање и проширување на постоечката Програма за урбана опрема согласно важечките законски одредби, а проширувањето на Програмата се однесува на вклучување на нови зони од градот како што е Битолската касарна и воведување на евентуално нови типови на урбана опрема според потребите на градот.

-Следниот заклучок на стручната фела е отповикување на Одлуката за утврдување на критериуми и стандарди за поставување на урбана опрема на подрачјето на Општина Битола, донесена со одлука на Советот од 2018 година во делот на условите за поставување на урбана опрема во старото градско јадро на Битола и старата Битолска чаршија во зимскиот период, поради несогласување на истата со Програмата за урбана опрема од 2016-2017 година како и со Законот за заштита на културно наследство и Законот за прогласување на старото градско јадро на Битола за културно наследство од особено значење. Воедно, еден од заклучоците е да се воведе посебен третман на дефинираните плоштади во однос на поставувањето на урбаната опрема со цел да се спречи губење на функцијата плоштад. Да има засилени контроли на терен и преземање мерки од страна на комуналната инспекција со цел поклопување на состојбата на терен со издадената документација за поставување на урбаната опрема од страна на Општината Битола-информираше Анастасија Трајковска која претседава со работното тело за изготвување на новата Програма за поставување на урбаната опрема на јавните површини во Битола.

Според експертите неопходно е следење на степенот на реализација на Програмата за урбана опрема на годишно ниво и одредување на минимален праг на реализација на истата. Унифицирање на засебните елементи на урбана опрема за предвидените микролокации преку распишување на конкурси за дизајн со вклучување на дел од постоечкиот инвентар на Општината. Посебен акцент да биде ставен на изнаоѓање на повеќе локации за поставување на парковска опрема, детски игралишта и опрема во функција на рекреативни содржини, подеднакво во сите делови на градот, се заклучоците на работното тело.

-Главната забелешка на стручњаците беше час поскоро да се отпочне со ревидирање на постоечката Програма онака како што беше комплетно изработена во 2016-2017 година каде што ќе бидат прочистени и вметнати сите измени и дополнувања и после тоа кога ќе се избере изработувач, јас се надевам дека тоа ќе биде Јавното претпријатие за урбанистичко планирање и проектирање, ќе се одржи јавна презентирана пред работното тело на коешто повторно ќе имаме можност да ги посочиме нашите забелешки и сугестии и таквата Програма потоа ќе биде доставена до Советот на Општина Битола за нејзино одобрување-посочи Трајковска.

На прашањето на угостителите дали ќе се стигне новата програма да се изготви до септември, за да бидат подготвени за зимската сезона, Трајковска посочи дека во овој период важечка е постоечката Програма, онака како што и на терен е означено за кафулињата на Широк Сокак до каде треба да ги поставуваат масите и столиците.

-Голем дел од кафулињата се придржуваат, а граѓаните тоа позитивно го оценија и сопствениците на кафулињата не треба да имаат никаква грижа, бидејќи моментно е на важност постоечката Програма за урбаната опрема, дури не се донесе нова и во тој дел ништо не е отповикано-појаснува Анастасија Трајковска која претседава со работно тело.

За потсетување, градот Битола во 2016 година доби Програма за поставување на урбана опрема на јавните површини за периодот од 2016-2017 година. Но, за период од нецели 8 години, оваа програма претрпи 18 измени и дополнувања, што според експертите индицира на ексклузивност во пристапот, наспроти современите тенденции за инклузивност во урбаните развојни процеси.

-Затоа, треба да се дефинира стратешки и методолошки пристап во креирањето на визијата за урбаната опрема на градот и тоа не само од технички аспект, туку и од естетски и од аспект на урбана мобилност и прифатливост за сите корисници на јавниот простор, беше посочено на денешниот состанок на работното тело за изготвување на новата Програма за поставување на урбаната опрема на јавните површини во Битола.