Голдман Сакс проценува дека цената на златото би можела да достигне речиси 5.000 долари за унца доколку независноста на Федералните резерви биде поткопана, а инвеститорите пренасочат барем мал дел од своите инвестиции од американските државни обврзници кон жолтиот метал.

Во основното сценарио, банката предвидува раст до 4.000 долари до средината на 2026 година, додека во поризични околности, златото би можело да скокне до 4.500 долари, односно речиси 5.000 долари за унца, пишува Блумберг.

Аналитичарите нагласуваат дека евентуалното слабеење на независноста на Федералните резерви би довело до повисока инфлација, пад на цените на акциите и долгорочните обврзници и ерозија на статусот на доларот како глобална резервна валута. Спротивно на тоа, златото се смета за безбедна вредност што не зависи од довербата во институциите.

Оваа година, златото е веќе меѓу најпрофитабилните стоки, со раст од повеќе од 33 проценти и рекордни нивоа над 3.578 долари за унца. Главните фактори на раст се купувањата од страна на централните банки. Дополнителен притисок врз пазарот создаде иницијативата на американскиот претседател Доналд Трамп за зголемување на контролата врз Федералните резерви, вклучително и обидот за замена на гувернерката, Лиза Кук. Анализата на Голдман, насловена како „Диверзифицирајте во стоки, особено злато“, истакнува дека златото останува најсилната препорака за инвеститорите во стоки.

Во исто време, глобалните финансиски лидери, вклучително и претседателката на Европската централна банка Кристин Лагард, предупредуваат дека губењето на независноста на Федералните резерви би претставувало сериозна закана за светската економија.