Министерот за финансии на Израел, ултрадесничарот Безалел Смотрич, денеска побара целосна окупација на Појасот Газа и, „ако се покаже неопходно“ – воена администрација.

-Ова е патот за да ја осигураме нашата безбедност и ова е патот да ги донесеме заложниците дома брзо, напиша тој на социјалната мрежа „Икс“.

Тој се согласи со премиерот Бенџамин Нетанјаху дека војната во Газа не смее да заврши без целосен пораз на палестинската милитантна организација Хамас и дека треба да заврши со нејзино протерување од Појасот Газа.

Во саботата Нетанјаху ја повтори својата позиција во снимено обраќање.

-Нема да ја завршиме „војната на преродбата“ пред да го уништиме Хамас во Газа, пред да ги вратиме сите наши заложници и пред да се осигураме дека Газа повеќе не претставува закана за Израел, рече Нетанјаху.

Според Израел, во моментов има 24 живи заложници и 35 тела на убиени заложници во Појасот Газа. Индиректните преговори меѓу Израел и Хамас за прекин на огнот и ослободување на заложниците во моментов се во прекин.